Komunidade Subdistritu Atsabe, Distritu Ermera, lamenta makas kona ba eletrisidade tanba selu fula-fulan maibe ahi mate nafatin loron-kalan.
“Ami fula-fulan selu ahi $2.50 maibe ahi kontinua mate lakan,”hateten Eujevio de Araujo, hosi komunidade Atsabe, semana kotuk (6/10), iha Atsabe vila.
De Araujo hateten hatak bain-bain ona eletrisidade kalan ida lakan no kalan ida mate.
“Kalan ida lakan no kalan ida mate tanba makina bot ladun forsa atu to’o iha suku Baba Kraik no Mota Bandeira.”
Komunidade ne’e apela ba Governu atu tau jerador nebe diak hodi bele lakan loron-kalan hanesan distritu sira seluk.
Enkuantu Joao Fernandes Monteiro, hosi Aldea Irai, iha Suku Parami, Atsabe, hateten katak ai-rin eletrisidade nebe Indonesia halo to’o iha sira nia suku laran maibe to’o agora Governu sidauk dada fiu hodi fornese eletrisidade ba nia komunidade.
“Ami hamutuk Aldeia tolu mak la hetan ahi ne’e,” Joao Fernandes dehan.
Nia haktuir katak ukun an durante besik tinan sanulu ona maibe sira kontinua la hetan ahi.
“Ami persija tebes atu hetan ahi maibe to’o ohin loron Governu nunka taumatan ba ami,” hateten sidadaun Fernandes.
Wainhira TDW ne’e koko konfirma asuntu ne’e ba iha Eletrisidade de Timor-Leste (EDTL) Atsabe maibe funsionariu nebe mak tama konta ba eletrisidade ne’e la iha fatin atu hatan perguntas hosi media.
