Tuir Xefe Bankada ASDT Domingos da Costa katak maske sira nia partidu oras ne’e dadauk fahe ba rua maibé ASDT nafatin ida de’it.
“Foin dadauk ami halo kongresu ne’e mós senhor Francisco Xavier nia mak sai hanesan Prezidenti partidu ,so ke ami hare kondisaun Sr.Xavier nian la dun admiti atu tun ba iha baze mak Gil Alves sai hanesan prezidenti honorariu hodi servisu iha baze,”hatéten Xefe Bankada da Costa,semana kotuk (30/09) iha Parlamentu.
Nia reforsa, partidu ASDT laiha mudansa maibé kontinua la’o tuir nia estrutura antigu nian.
“Maske senhor Gil Alves nian la’o ketak maibé nia la’o hamutuk ho ami duni ho senhor Xavier ami dalan ida de’it, nia reforsa.
Maibé tuir nia, grupu ida ne’ebé mak lori fali Prezidente Xavier nia naran iha fatin hotu-hotu ne’e mak “ita konsidera ilegal tanba sira nia naran iha estrutura antigu nian la iha,”nia katak.
Iha fatin hanesan tuir Deputada ASDT Tereza Amaral katak grupu Gil no grupu prezidente Xavier nian mesak ASDT hotu.
“Sira la iha bandeira partidu rua, konforme sira dehan,bandeira ida de’it,programa ida de’it lori hodi hato’o ba povu,”nia dehan.
Membru ASDT ne’e ne’e hatutatan katak, se ida idak nia bandeira no ida-idak nia programa mak hato’o ba povu entaun bele akontese problema.
“Tanba ne’e mak ita nia proklamador hatéten katak, ninia kondisaun la dun diak nia agora dadauk halo tratamentu Saúde iha Singapura nia fila fali mai mak foin rezólve,”nia informa.
