Komunidade Subdistritu Atsabe, Distritu Ermera, dada iss tanba la iha kapasidade finanseira atu sosa fos tanba folin kontinua sae nafatin.
“Ami husu ba Governu se bele oinsa bele hatun fos nia folin iha Merkado, atu nune’e ami nebe hela iha distritu bele sosa hodi sustenta ba ami nia familia” hateten Armando da Silva, komunidade Atsabe, iha semana kotuk (6/10).
Komunidade da Silva haktuir tan katak horas ne’e dadauk fos folin iha Merkadu Atsabe 25 Kilograma (kg) nia folin $17 no ba 30 kg sae ba $22.
“Tanba ne’e mak ami husu ba Governu atu hatun nia folin tanba tinan ida ne’e kafe mos folin la iha,”hateten membru komunidade Atsabe ne’e.
Entertantu Eusebio de Araujo hateten katak fos folin iha Atsabe horas ne’e sae ba bebeik maibe Governu tanba la halo intervensau iha Merkadu.
“Ami povu kik la iha apasidade atu sosa fos karon ida tanba sae ba bebeik deit,” Eusebio dehan. Nia mos apela ba Governu atu kontrola ho aktivu liu tan folin fos iha merkadu.
“Ami nia sujestaun ba Governu mak atu kontrola folin fos iha merkadu atu nune’e ami bele sosa,”nia haktuir.
Iha parte seluk, negosiante fa’an fos iha Merkadu Atsabe hateten katak sira fa’an ho presu nebe karun tanba hasai hosi loja boot iha Dili saka ida ho 25 Kg ho presu $15 no selu tan ba transporte hodi tula.
“Ami lori mai fa’an fali iha ne’e 25 Kg ho presu $17 atu nune’e ami hetan dolar ida,” hateten Negosiante Atsabe Vicente Malaisi.
Nagosiante Malaisi hatutan tan katak fos nebe mak nia hasai hodi fa’an iha merkadu Atsabe hasai iha Toko Lucky Strick, iha Audian Dili.
“Se ami hola neba mak saku ida sira fan mai ami $13 no $14. Ami lori mai tenki fa’an ba dolar $15 ka $16,” nia haktuir.
