Professores nain 28 ne’e sei ba tuir formasaun iha Universidade Aveiru, iha Portugal, atu tuir Formasaun ba Formadores atu wainhira fila fali mai iha Timor-Leste bele fo fali formasaun ba maluk professores seluk hosi ensino sekundario iha tinan 2012.
“Planu kurikular iha displina 14 portantu husi disiplina ne’e reprezentante ema nain rua mak sei ba tuir formasaun iha Universidade Aveiru de Portugal,” hateten Director Kurikulum Nasional, Raimundo Jose Neto, semana kotuk (30/09 ), iha Salaun Konferensia Ministerio Educasaun, iha Vila Verde, Dili.
“Orsamentu ne’ebe iha ami fahe ba parte rua. Parte ida, Ministerio Educasaun mak sei toma konta. Hamutuk ba ema nain 14, total orsamentu hamutuk dois mil quinhentos Euros durante fulan ida nia laran atu han no hemu nian. Parte rua husi Universidade Aveiru, Portugal, mak sei toma konta hamutuk ema nain 14 sira ne’e sei ba simu iha Universidade Aveiru Portugal total orsamentu mil quinhentos Euro” hateten Director Neto.
Nia reforsa tan katak professores sira ne’e la os ba tuir deit formasaun maibe sira mos sei ba vizita fatin historiku iha Portugal durante semana neen nia laran no mos vizita eskola-eskola iha Portugal.
Entretantu Professor Marcelo Caitano de Sousa husi Escola Publiku No. 4 de Setembru UNAMET, iha Balide, Dili, hateten objektivu inisiative ne’e atu oinsa atu ba servisu ho didiak atu implement kurikulum nasional ba ensino secundario ne’ebe sei implementa iha 2012 tamba kurikulum importante ba sector educasaun iha Timor-Leste.
“Hau sente orgulho tebes ba formasaun ida ne’e, hau sei ba estuda didiak atu bele elabora kurikulum nasional ne’e sai feitu liu atu nune’e ikus mai bele edukasaun iha Timor-Leste bele ba oin,” haktuir Professor Sousa.
