Tuir Deputada Maria Rosa Camara alias Bisoi katak presiza kria lei ida kona-ba pornografia nian hodi regula ema sira ne’ebe gosta halo pratika pornografia iha rai laran.
“Tenke kria no aplika lei ne’e iha nasaun ida ne’e tanba ita iha evidensia barak no realidade ema estranjeiru inklui Timor Oan barak halo pratika pornografia hanesan akontese iha hotel Katuas,ho nune’e bele regula ema sira ne’ebe gosta involve iha hahalok aat ne’e,” hateten Deputada Bisoi,semana kotuk (04/10) iha Uma Fukun,Dili.
Tuir nia, esbosu lei kona-ba ida ne’e iha ona maibe seidauk bele tama iha Parlamentu Nasional tanba iha lei barak mak to’o agora sei pendente hela.
Entretantu Diretora Rede Feto (RF) Jacinta Luzinha hateten Timor-leste presiza kria lei ida ne’e tanba ho nune’e bele regula hahalok aat pornografia nian.
“Hau hanoin ne’e importante iha ita nia rai laran parte ida hanesan edukasaun moral no ita hanesan Timor oan ita iha ita nia kultura no maturidade mesak fo valor liu ba moral tanba maioria ho relijiaun Katolika,”nia apoia.
Iha lidun seluk joventude Rosantina da Costa hateten maske pornografia la’os buat foun ida tanba desde uluk okupasaun Indonezia kedas Timor oan barak mak involve iha hahalok ne’e tanba ne’e presiza lei ida atu regula buat sira ne’e.
“Hau apoia planu feto Parlamentu nian atu kria lei ida ne’e,tanba agora labarik barak mak komesa nonton pornografia, ne’e halo aat labarik nia mentalidade,”nia katak.
