“Liu-liu iha Kamea Has laran bee mai oras rua de’it maibé kuandu ahi maté bee mós para,” informa Deputada Tereza de Carvalho husi bankada Partidu Demokrasia (PD) semana kotuk (03/10) iha plenaria Parlamentu.
Tuir nia, problema ne’e hato’o tiha ona ba iha Sekretariu Estadu Agúa e Urbanizasaun ho Diretor SAS maibé até agora laiha rezultadu.
“Dala ruma ahi maté dadersan tuku hitu entaun komunidade sira labele asesu ba bee moos,”nia afirma.
“Tanba ne’e mak ha’u husu ba reprezentante Governu iha ne’e atu hato’o ba sekretariu estadu para atu bele hadia be sira ne’e,”nia sujere.
Iha fatin hanesan Prezidenti Komisaun G Pedro da Costa hatéten, dala barak komunidade la kohi kontribui sobu fali kanu bee nian hodi suli estraga de’it .
“Se ita kuidadu kanalizasaun sira ne’e, labele tesi arbiru bee bele to’o,”Pedro dehan.
Pedro hatutan,iha parte balun komunidade sira nebe hela besik be halo kuak kanu hodi taka dalan ba komunidade sira seluk bee la to’o.
“Sira hakarak dada bee ba sira nia aan, e depois balun utiliza fali rega modo no balun uza fali fase kareta iha dalan ninin,” nia kestiona.
Tanba ne’e nia parte husu ba komunidade tomak iha Dili laran ne’ebé uza bee SAS nian atu kuidadu buat ne’ebé estadu halo tiha ona,liu-liu kanu ne’ebé uza dada bee moos nian.
“Kuidadu estalasaun bee nian,kuidadu estalasaun eletrisidade nian atu nune’e ita iha eletrisidade no bee ba ita,”nia husu.
