“Fin de semana hau ba iha Viqueque to’o iha dalan klaran parte Builale Ossu nian, hau hetan Carro Funerariu ida nebe lori hela mate ba para iha dalan tanba kareta aat,” hateten Deputada Ilda Maria da Conceição, iha plenaria, Parlamentu Nasional, Dili, foin lalais (10/10).
Deputada da Conceição hateten katak, Carro Funerariu lori mate isin ne’e aat iha neba durante horas ida nia laran.
“Hau senti triste tebe-tebes kuandu familia atrapailiadu lahatene atu lori mate ne’e ba iha nebe”Ilda nehan.
Nia hatutan tan katak, buat barak iha rai laran persija halo maibe osan barak mak fakar sai ba liur.
“Povu nebe nia ema mate triste persija ita nia apoiu, ita lori buat sira ne’e ba, ba para tuir deit iha dala-dalan.”
Tuir Deputada da Conceição katak, nia rasik akompania mate isin to’o iha Larigutu maibe tenki kareta ne’e para tan.
“Iha neba hau halai uluk hau ba buka be nebe tau radiador para depois atu ajuda lori liu mate ne’e to’o iha Watulari ba liu iha Ira–Lere.”
Nia mos esplika katak, iha momentu ne’e Deputada rasik telefone kedas ba iha Sekretariu Estadu Dejastre Naturais, Jacinto Rigoberto, mak foin telefone ba Ambulancia Viqueque nian mak foin bele lori mate isin ne’e ba to’o iha Watulari.
Entertantu Deputadu David Dias Ximenes katak, kareta sira nebe tuir para iha dalan–dalan katak nudar ema tenki tun ba soe be.
“Agora Ambulancia mos para iha dalan, keta mate mos tun ba soe be karik ita lahatene” hateten Deputadu Ximenes.
Tuir Deputadu ne’e katak agora ita koalia oinsa lohi mos la diak, la lohi mos ladiak. “Agora ida tan mak, osan halai fali ba Australia mos la los, nebe agora osan mos iha ain halai,” Deputadu Ximenes haktuir ho sarkastiku.
