Secretaria Estadu ba Promosaun Igualidade (SEPI), SE Idelta Maria Rodriques, hateten katak feto tenke luta no kapasita aan raisk atu partisipa iha eleisaun 2012 tamba feto no mane iha direitu ne’ebe hanesan.
“Atu sai lideransa presiza ita nia matenek no iha kapasidade. Feto mos bele sai lideransa karik ita hatudu ona ita nia kapasidade ne’ebe iha’,” hateten SE Rodrigues durante workshop ida iha Comoro, Dili, Semana kotuk (22/09).
Nia mos hatutan katak agora dadaun partidu ida-idak tenke iha feto tamba ne’e la bele hein de’it maibe oinsa dezenvolve no kapasita aan iha futuru.
Iha parte seluk Agusta Quintão husi partidu Liberta Povu Ai-leba (PLPA) hateten kuandu partidu ida maka la iha feto entaun iha ona diskriminasaun.
“Dala ruma partidu balun kuandu hili feto hare liu ba nia oin no hatais tamba ne’e mak sira la kohi bolu maluk feto atu tama sira nia partidu,” dehan Quintão. Nia mos hatutan kataka partidu lafihir ba oin no hatais maibe fihir ba lian ne’be di’ak no iha kualifikadu entaun ema sei dehan feto mos bele.
Maske iha ona regulamentu ne’ebe asegura feto nia direitu maibe realidade hatudu iha feto balun seidauk sente kona-ba nia direitu.
Kona ba kestaun ne’e Sisto dos Santos, nudar Manager Advokasia ba Direitu Humanus (HAK), hateten ema nia kapasidade la fihir ba feto ka mane karik feto mak iha kapasidade aas liu entaun tenke dezenvolve ba oin.
“Feto balun mak iha kapasidade ita tenke rekoñese no promove. Importante laos hare ba nia feto ka mane maibe oin sa nia lidera no determina ona sosiadade ida nia vida,” Manager HAK dos Santos. Nia mos hatutan agora dadaun iha ona mudansa hanoin iha sosiadade nia laran katak feto iha ona avansa atu partisipa iha vida politika tamba ne’e kapasidade ne’ebe feto iha tenke avansa ba oin nafatin.
Bazeaba relatorio ne’ebe hato’o husi SEPI iha workshop katak Timor-Leste hanesan nasaun ba dala 26 iha mundu ne’ebe feto iha partisipasaun bo’ot iha vida politika.
