Iha era globalizasaun hanesan agora palku politika la’os deit ba mane maibé mos feto tanba feto nia partisipasaun iha vida politika importante tebes hodi fo kontribuisaun ba dezenvolve nasaun ne’e ho diak iha futuru.
“Feto nia partisipasaun iha vida politika determinante tebes hamutuk ho mane sira hodi lori ita nia rai ba oin.Iha tempu rezistensia feto hamutuk ho mane sira luta iha frente politika,frente armada, frente klandestina no frente diplomasia,”katak Laura Pina,Membru Rede Feto semana kotuk (01/10) bainhira partisipa iha seminariu kona-ba partisipasaun feto iha vida politika no governu iha Excelcior Resort Pantai Kelapa,Dili.
Tuir Pina, kompara ho nasaun seluk iha Asia,iha Timor-leste partisipasaun feto iha vida politika iha mudansa pozitivu tanba numeru feto iha Parlamentu ne’ebé agora iha feto na’in 20.
“Tanba ne’e importante tebes atu feto sira partisipa iha vida politika,tanba liu husi politika bele halo buat ne’ebé diak ba ita nia povu, haburas ita nia ekonomia iha vida social ho diak liu tan,hasa’e kualidade edukasaun ba ita nia povu liu-liu ba feto maluk sira,”nia dehan.
Nia espera katak partisipasaun feto iha Parlamentu,Governu,sosiedade sivil inklui lideransa komunitaria bele aumenta iha futuru.
Iha fatin hanesan tuir reprezentante Grupu Feto Parlamentar Aicha Basarewan katak maske TL nasaun foun maibé partisipasaun feto iha area politika, military, Governu no sosiedade sivil maka’as liu hodi fo kontribuisaun ba dezenvolvementu nasaun nian.
“Ha’u hanesan feto Parlamentar ha’u agradese tebes tanba konferensia ne’e ami deskuti atu reforsa feto partisipa iha nivel politika oinsa bele ativu diak liu tan,”nia esperansa.
Entertantu Xefé Ezecutivu Fundasaun Alola Tereza Verdial hateten konferensia ida ne’e hanesan oportunidade ida ba feto Azia Pasifiku, TL kontinua sira nia esforsu ba avansamentu igualidade jeneru iha nasaun foun ida ne’e.
“Ami esperansa ativamente iha aliansa feto Asia hahu iha tinan 2010 ne’e esperansa ida katak kolabora saun sei kontinua haburas iha Timor iha futuru,”Verdial esperansa.
