Negosiante Roda tolu (R3) ne’ebe durante ne’e fa’an iha area Palasiu Governu oin halerik tanba rendementu ne’ebe sira hetan ladun diak.
Lino Freitas,negosiante R3 ne’ebe bai-bain fa’an iha fatin ne’e hateten rendementu ne’ebe nia hetan husi fa’an sasan durante loron tomak oituan los.
“Depende ema sosa,hau fa’an iha ne’e husi dader to’o jam 12 kalan de’it tanba kalan ema lanuten barak dalaruma estraga ami nia sasan,”hateten Lino Freitas semana kotuk (23/09) iha Palasiu Governu oin.
Nia hatutan,rendementu nia hetan depende ba ema mai sosa “sekuandu ema mai hola barak entaun loron ida bele hetan $4,00 ka 5 dolar, se la’e laiha liu, enkuantu modal ne’ebe hasai hodi sosa sasan sira ne’e $60,00 ka $70,00,”nia dehan.
Tuir nia, rendementu ne’ebe nia hetan husi fa’an roda tolu ne’e la sufsiente atu sustenta familia uma laran.”balun hodi sosa hahan,modo no suporta oan ba eskola, ne’ebe ida ne’e la to’o,”nia katak.
Iha fatin hanesan vendedor Germano Belo hateten rendementtu ne’ebe sira hetan husi fa’an R3 ne’e oituan,la barak.
“Ami fa’an loron to’o kalan hetan deit 4 dolares Amerikanu, barak liu mak $5,00 ne’e ona,”nia katak.
Negosiante sira ne’e mos bainhira kalan la fila ba uma maibe toba deit iha hali okos, nune’e dadersan hader mai bele kontinua fa’an fali. “Se la toba iha ne’e, se mak hare ami nia sasan sira ne’e,tanba ho ami nia familia moris ho roda tolu ne’e,” Belo dehan.
Entretantu bainhira jornalista koko konfirma asuntu ne’e ba iha Administrador Distritu Dili, Ruben Braz de Carvalho maibe lakonsege tanba laiha fatin.
