“Maibe atu utilize edifisiu ne’e, governu tenke prepara lei, rekursu umanu no tenke hili ema ne’ebe iha kapasidade hodi sai prezidente Kamara Munispal,”hateten Deputadu Pedro da Costa Martires, semana kotuk (29/09) iha Uma Fukun,Dili hafoin halo fiskalizasaun ba konstrusaun ne’e.
Tuir nia,objetivu harii Camara Municipiu ne’e atu fahe poder servisu iha Governu distrital no Governu sentral.
“Atu halo desentralizasaun iha ita nia rai ,ita fahe poder ba distritu sira ne’e hanesan reseitas ba distrital nian,”Pedro esplika.
Nia sublina katak, Camara municipiu ne’e wainhira parlamentu aprova orsamentu hodi halao projetu iha distritu Governu sentral aloka deit orsamentu ba distritu ,sira mak implementa iha distritu laran.
“Governu sentral halo fiskaliza deit ba projetu sira, halo los ga la’e, se la halo los dada de’it sira ba halo los,”nia katak.
Entertantu eis Vise Primeiru Ministru Deputadu Mario Viegas Carascaláo hateten, estabelese Camara Municipiu ne’e atu halo desentralizasaun.
“Ita labele sasan hotu-hotu Governu sentral de’it mak ka’er maibe kestoens barak mak ita hare ,pur ezemplu kestaun bee moos, eletrisidade , kestaun hamos sidade ninian tenki autoridade Camara Municipal mak kaer,”Mario esplika.
Tuir nia, durante ne’e programa barak mak la la’o iha distritu sira tanba mai hotu iha Governu sentral maibe atu estabelese KM tenke iha lei ida.
“Se la’e labele tanba foin dadauk ita nia delegasaun ba to’o iha Cabo Verde,iha ne’eba implementasaun Kamara Munispiu la’o kapas loos,”nia dehan.
Alende ne’e tuir Deputadu Manuel Tilman katak Kamara Munisipiu to’o 2013 mos seidauk bele estabelese tanba buat barak mak presiza atu hare.
“Governu ida ne’e seidauk bele estabelese Camara Municipiu ne’e tanba Governu ida ne’e esensial liu gasta tiha ona seis sentus miloens ba eletrisidade maibe ahi seidauk lakan, hanoin tan ba harii Camara Municipiu ne’e atu gasta tan hira,”nia preokupa.
Entretantu bainihra jornalista tenta konfirma asuntu ne’e ba iha Ministru Administarsaun Estatal Ordenamentu du Teritoriu (MAEOT Arcengelo Leite maibe lakonsege tanba ministru latama (lisensa hela).
