Tuir Prezidenti Komisaun C Parlamentar,Deputadu Manuel Tilman katak, Lei Investimentu Privadu aprova tiha ona iha Parlamentu no Xefe Estadu mos promulga tiha e agora hein para governu ezekuta.
“Horseik hau hare iha televizaun senhor Ministru Ekonomia e Dezenvolvimentu halo ona sosializasaun ho nia funsionariu sira atu nune’e oinsa sira bele kumpri lei ne’ebe aprova tiha ona,” informa Manuel Tilman semana kotuk (29/09) iha Uma Fukun,Dili.
Tilman afirma katak, Lei investimentu privadu ne’e atu regula emprezarius no Investidor estranjeiru sira ne’be investe iha Timor-leste.
“Atu konsidera investidor estranjeiru, nia tenke hatama investimentu miliaun ida rihun atus lima (US$ 1.500.000,00),”Tilman dehan.
Nia hatutan, emprezariu nasional ne’ebe mak uluk investe iha rai laran gasta deit rihun lima ,sai ona investidor nasional.
“Agora ita hatene hira ho rihun limanulu, dezenvolviemntu desentralizadu ,PDD 1 ,PDL ,Projetu Komunitaria , programa MDG hari uma lima to’o agora osan seidauk ba iha distritu sira ne’e, “nia kestiona.
Enkuantu tuir Deputadu Pedro da Costa Martires husi bankada CNRT katak, Lei Investimentu Privadu ne’e importante ba emprezarius sira, oinsa bele fasilita emprezariu sira kuda sira nia modal iha projetus nasionais.
“Lei ne’e mos loke dalan ba emprezarius estranjeiru atu mai investe iha ita nia rai laran maibe tenke hatun impostu, “nia dehan.
Tuir nia, investidor estaranjeiru investe iha Timor ho modal US$ 500.000,00 iha banku, sira bele konkore projetu sira iha rai laran.
