Eskola Sekundaria Rainha da Paz ne’ebe hetan estragus iha krizi 2006 to’o agora seidauk hadia,maibe prosesu aprendizajen kontinua la’o ho diak sein iha failansu.
“Prosesu aprendizajen la’o normal hanesan ho eskola sira seluk,karik ami sei liu eskola balun tanba ami nia estudante sira tama eskola ho kontente nune’e ami hanesan profesores maske ami nia eskola sei dauk hadia,”hateten Diretor Eskola Rainha da Paz,Hendrique C.da Costa semana kotuk (29/09) iha Bebonuk,Dili.
Nia hatutan, mesmo kondisaun escola aat hela maibe alunus balun hetan bolsu estudu husi ajensia internasional husi Australia nian.
“Kuaze estudante na’in 20 mak hetan bolsu estudu hodi selu sira nia eskola e ami mos kopera ho ajensia Australia nian kona-ba fo kursu lian Inglesh baa mi nia estudante sira e agora ami alunus nain 18 mak eskola iha liur,”nia dehan.
Tuir nia, lolos eskola halo ona rehabilitasaun maibe sei iha limitasaun material konstrusaun,enkuantu total alunus husi primaria to’o sekundaria hamutuk nain 500 ka 600. “Ami fahe orariu eskola, SD no SMP tama dader no SMA tama meudia,total mestre iha 31,nain 7 hanorin iha SMA,”nia esplika.
Enkuantu tuir estudante Roberto Cardoso Magno,sente kontente maske ho kondisaun eskola ne’ebe sei aat tanba prosesu aprendizajen la’o ho diak. “Maibe ami nia livrus mak sei menus inklui ami nia profesores sira,”nia katak.
Entretantu bainhira jornalista tenta konfirma asuntu ne’e ba iha Ministeriu Edukasaun maibe sira lakohi fo komentariu tanba eskola Rainha da Paz la’os eskola publiku maibe privadu.
