Problema eletrisidade ne’ebe mate-lakan la’os deit akontese iha capital Dili maibe mos capital Distritu hanesan iha Distritu Liquisa,komunidade sira lamenta tanba kada fulan sira selu maibe ahi mate bei-beik.
“Hau hakarak hateten deit katak ohin loron komunidade Distritu Liquisa tenke selu tuiri amper, amper 2 sira selu 6 dolar maibe ahi mate nafatin e selu nafatin,” informa Deputadu Francisco Jeronimo husi bankada Fretilin, semana kotuk (27/09) iha Uma Fukun,Dili.
Tuir nia, ba komunidade ba-bain uza deit amper 2 mak selu 6 dolar kada fulan maibe ba emprezariu sira kada fulan selu 12 dolar,maske ahi lakan oras ida deit. “Ne’e justisa iha ne’ebe?,”nia lamenta.
Entretantu tuir Deputadu Inacio Moreira,katak lolos ahi labele mate tanba komunidade sira selu. “Se nia selu fulan ida 6 dolar ba amper 2 nian maske ahi mate hela deit,ita kalkulu selu 6 dolar ne’e halo oinsa,”nia preokupa.
Tuir Inacio, Komisaun G iha obrigasaun atu husu responsabilidade ba Sekretariu Estadu Eletrisidade Agua e Urbanizasaun (SEAU) nian, tanba sa mak komunidade selu ful-fulan maibe ahi kontinua mate.
“La’os ida ne’e de’it maibe iha Watu-Lari ,Watu-Carbau sira tula konbustivel ba iha neba kada semana –semana maibe ahi la lakan “Inacio hateten.
Tuir informasaun nebe mak deputadu ne’e hetan husi komunidade sira katak, durante semana rua nia laran to’o agora ahi kontinua mate.
“Mas tenki justifika ,konbustivel mak la iha,ga,jerador mak at ga oinsa,mais hau hau hakarak hateten deit katak, depende ba kapasidade ema nian mak buat sira ne’e sai runguranga hotu”Inacio katak.
