Atu prevene asidente trafiku ne’ebé mosu iha kualker tempu iha fatin ne’ebé de’it,husu ba inan-aman sira atu kontrola oan sira ho minoridade atu labele lori motor sai mai iha estrada publiku.
“Inan-aman iha obrigasaun atu hare ba nia oan sira,bandu sira labele lori motor sai mai estrada publiku tanba sira nia idade seidauk to’o,”hateten Deputadu Duarte Nunes,semana kotuk (30/09) iha Uma Fukun,Dili.
Nia parte hato’o kestaun ne’e relasiona ho labarik minoridade barak mak ohin loron lori motor iha estrada publiku,maske seidauk akontese asidente trafiku ruma ba sira maibé husu ba polisia tranzitu atu kontrola didiak sira.
Nia hatutan, labarik ho idade minoridade seidauk iha responsabilidade ba transporte ne’ebé nia lori e tribunal labele kondena sira bainhira soke ema ruma.
“Inan-aman sira mak responsabiliza, sira mak sala tanba sira mak fo transporte ba oan ho idade sei ki’ik,”nia dehan.
Tuir kodigu penal, ema ne’ebé lori transporte sein iha SIM, ne’e krimi, tanba ne’e inan-aman inklui mos polisia tranzitu atu kontrola hodi hola medidas ba sira.
“Idade ne’ebé bele lori transporte tenke 18 anos ba leten no tenke iha karta kondisaun,”nia katak.
Iha parte seluk Cesaltino dos Santos, labarik ho idade kiik ne’ebé lori hela motor iha estrada publiku hateten maske nia idade sei ki’ik maibé bainhira lori motor,nia bele kontrola aan.
“Ita mak tenke hanoin atu bele halai iha estrada publiku,liu-liu bainhira iha transporte barak oinsa mak it abele hases aan husi asidente ruma,”nia dehan.
Entretan bainhira jornalista tenta konfrima asuntu ne’e ba iha Komandante Polisia Tranzitu nian Antonio Soares no Komisaun Konvensaun ba Direitu Labarik nian Komisaria Adalgiza Ximenes maibé lakonsege tanba okupadu no Adalgiza rasik laiha fatin.
