Tuir Sekretariu Estadu Formasaun Profesional e Empregu (SEFOPE) Bendito Freitas katak lei traballador ne’ebe oras ne’e diskute hela iha komisaun H Parlamentar sei fo vantajen diak ba traballador Timor Oan sira hodi defende sira nia direitu liu-liu defende sira nia kontratu.
“Atu nune’e empregador ou patraun sira labele hola kualker desizaun atu hapara traballador sira kuandu laiha fundamentu ne’ebe justu, e iha lei ne’e koalia hotu buat sira ne’e,”hateten SE.Freitas semana kotuk (03/10) hafoin halo diskusaun ho komisaun H kona-ba lei traballador nian iha Parlamentu Nasional.
Nia hatutan,oras ne’e dadaun lei kodigu laboral ne’e konsege diskute ona artigu 72 no aprovadu iha komisaun H e kontinua ho artigu 73 to’o 79 no iha mos artigu 92 to’o 98 ne’ebe koalia kona-ba greve nian.
Iha mos artigu balun ne’ebe koalia kona-ba traballador sira ne’ebe difisiente no hetan moras kronika hodi bele hetan tratamentu ne’ebe igual no labele halo diskriminasaun iha servisu fatin.
“E ami mos diskute lei kona-ba traballador kriansas ka minoridade ne’ebe tenke hetan mos atensaun especial tanba agora dadaun atu hakat ona ba iha negosiasaun kolektiva,”Sekretariu dehan.
Nia dehan, sira komisaun H ho SEFOPE sei esforsu aan oinsa mak halo remata lalais diskusaun ba lei ne’e nune’e bele submete ba iha plenaria.
Sekretariu rekonese katak agora dadaun iha empregador balun foti desizaun ne’ebe la favoravel ba traballador Timor Oan balun tanba laiha kontratu.
“Tanba ne’e mak ami kria lei ne’e e depois Parlamentu aprova tiha ami sei halo sosializasaun ba empregador sira atu fo valor no rekonesementu ba traballador sira,iha kualker tipu servisu tenke iha kontratu nune’e bele garantia sira nia direitu,”nia esplika.
Entretantu tuir Deputadu Mario Carascalao katak lei ne’e importante tanba atu defende direitu traballador sira nian.
“Kuandu laiha lei, maka traballador ida labele defende sira nia direitu no interese, tanba ne’e komisaun H ho SEFOPE tenke aselera prosesu diskusaun ba lei ne’e,”nia dehan.
