Relasiona ho alegasoens ba Ministru Edukasaun Joao Cancio Freitas ne’ebe sala utilize orsamentu estadu nian ba nesesidade privadu, Fundaaun Lia Loos rejistu ona kazu ne’e iha Ministeriu Publiku (MP) hodi halo prosesu investigasaun.
“Ami rejista ona kazu ne’e iha Prokuradoria Jeral da Republika iha 15 Setembru 2011 e ami mos entrega ona kopia ba iha Xefe Estadu,Xefe Governu, Prezidente Parlamentu inklui mos ba auditoriu finansas nian,”hateten Advogada FL,Angelica de Souza semana kotuk (27/09) iha Pantai Kelapa,Dili.
Nia hatutan, fundasaun hetan evidensia barak atu halo ona prosesu kona-ba kazu ne’e liu-liu uma privadu ministru nian ne’ebe halo iha nia moris fatin Ostico Loilobu-Baucau ho nia medidas 12 x 12 m2.
“Ami diskunfia katak uma ne’e halo ho osan estadu nian ne’ebe aloka ba ministeriu edukasaun e kualidade uma ne’e hanesan istana ne’ebe kompleta ho pesoal seguransa.Ami nia kalkulasaun osan ne’ebe gasta ba uma ne’e miliaun nia folin,”nia afirma.
Tuir advogada ne’e, ministru Cancio alende involve kazu korupsaun mos involve iha kazu abuzu poder no mal administrasaun, signifika nia kontra ona lei kodigu penal no lei ministerial nian.
“Tanba ne’e ami husu ba ministru Joao Cancio ho Adao Soares de Deuz atu halo klarifikasaun ba publiku kona-ba orsamentu US$1.4 miliaun ne’ebe gasta tiha ba nesesidade privadu,”nia husu.
Iha parte seluk Adjuntu Komisariu ba Prevensaun Komisaun Anti Korupsaun (KAK),Manuel C. Bucar C.Real hateten sira nia misaun mak atu halo prevensaun no investigasaun criminal ba krimi korupsaun.
“Ami prontu atu simu se se deit mak bele hato’o kazu sira ne’ebe mak iha relasaun ho korupsaun nian iha forma oi-oin,”nia dehan.
Alende ne’e komunidade ne’ebe lakohi publika nia identidade, husu ba ministrtu edukasaun atu klarifika lolos ba publiku kona-ba osan US$1.4 miliaun ne’e.
“Tanba tinan-tinan Parlamentu aprova orsamentu ho montante ne’ebe bo’ot ba setor edukasaun maibe realidade, infraestrutura eskola aat iha fat-fatin, livrus ba profesores sira mos menus, laiha meja-kadeira iha eskola hotu no seluk tan,”nia preokupa.
Fontes konfirmadu ne’e hatutan, tinan 10 ona ukun aan maibe fasilidade eskola kontinua uza husi tempu Indonezia nian.
