Relasiona ho problema barak ne’ebe akontese iha setor edukasaun nian ne’ebe to’o agora seidauk iha solusaun, husu ba Ministru Edukasaun atu resolve lalais problema sira ne’e.
Tuir Sekretariu Jeral Sindikatu Profesores Timor-leste (SPTL) Francisco da Costa Fernandes katak Ministru tenke kria tekniku sira hodi hadia sistema edukasaun ne’ebe diak nune’e labele akontese tan iha future.
“ Kurikulum ba estudante sira tenke feito , tenki iha mos ninia livrus , ita hare katak livrus agora dadauk ne’ebe mak professores sira uza iha tinan ida ne’e professores sira uza hotu ho lingua Portugues,”preokupa Sekjer SPTL Francisco da Costa Fernandes semana kotuk (23/09) iha Colmera Dili.
Nia hatutan, alende ne’e ministru mos presiza fo atensaun maksimak ba kondisaun profesores nian liu-liu kona-ba salariu nune’e prosesu aprendizajen bele la’o ho diak liu tan.
“Tanba professores sira mak sai hanesan abut ba iha setor educasaun, kualidade de ensino nian tenke bazeia ba kondisaun professores sira ho estudante sira bele halao prosesu aprendizasen ne’e bele lao ho diak e mos presiza defini farda nasional ba Ensino Baziko sira hotu iha Timor laran,”nia afirma.
Kona-ba livrus sira ne’e ho lian POrtugues siensia sosiais hanesan geografia, historia, sosiolojia no antropolojia, livrus hirak ne’e laiha historia Timor nian.
“Lolos iha livrus sira ne’e balun koalia kona ba oinsa moris ekonomia populasaun Timor nian, kona ba geografia iha Timor laran ne’e , oinsa atu bele koalia kona b a ita Timor ne’e mai husi ne’ebe , ita nia avo viza avo mai husi ne’ebe uluk ninia lala’ok oinsa hau hanoin iha livru sira ne’ebe mak agora dadauk professores sira uza ne’e laiha maibe mesak ema husi nasaun seluk nian deit mak iha,”nia preokupa.
Iha parte seluk Professora Aguida Freitas hateten setor educasaun presiza duni hadia liu liu mak professores sira nia kondisaun tenki tau mos atensaun maksimu tamba professores sira mak sai hanesan mata dalan ba estudante sira se kuando professores sira laiha educasaun labele la’o ho diak .
“ Ami nudar professores nia knar mak atu hanorin estudante sira maibe kuando iha parte ida laiha livrus atu hanorin ho situasaun ne’ebe aperta ami tenke uza fali ami nia esperiensia hotu ne’ebe ami hetan ona hodi hanorin fila fali ba estudante sira bazeia ba kurikulum ne’ebe iha,”nia kestiona.
Tuir nia ,buat ne’ebe esensial liu ba professores sira mak salario ba professores sira tanba se sira hanorin saugati deit oinsa sira bele moris atu bele sustenta ba sira nia moris lor-loron nian .
“Tan ne’e nudar professores sira nia knar mak atu hanorin estudante sira sai ema ne’ebe matenek no sai konhesido iha nasaun ida ne’ebe dezenvolvidu hanesan nasaun sira seluk,”nia dehan.
