Tuir Diretor Kurikulum Nasional e Avaliasaun Eskolar,Raimundo Jose Neto katak total estudante ne’ebe sei tuir izame nasional iha tinan ne’e hamutuk nain 32.576.
“Numeru ne’e mai husi eskola hotu-hotu iha teritoriu tomak tantu pre-sekundaria no sekundaria, izame nasional rasik sei hala’o iha 24 to’o 27 Outubru tuir kurikulum ne’ebe ministeriu edukasaun iha,”hateten Raimundo Jose Neto semana kotuk (26/09) iha Vilaverde,Dili.
Tuir nia, alunus hirak ne’e sei fahe ba komponente 3,primeiru 9 anos Ensino Pre-sekundaria hamutuk 20.485, Ensino Sekundaria jeral hamutuk 10.038 no ba Ensino Tekniku Professional hamutuk 2.053, e sira ne’e mak sei tuir izame nasional.
Nia hatutan, preparasaun ba izame nasional ne’e , ministeriu prepara desde Fevereiru hanesan materia sira e agora kompleta ona. Materia ba Pre-sekundaria iha materiais 5 , Sekundaria jeral iha 6, ba Tekniku Profesional iha materia 4.
“Total iha materiais 15 mak sei tama iha materiais ba izame nasional, e agora dadaun tama ona iha percetakan bahan,”nia katak.
Iha parte seluk tuir Diretor Ensino Sekundaria 4 Setembru UNAMET Ballide, Marcelino da Costa Ribeiro hateten husi sira nia eskola rasik total estudante terseiru ano ne’ebe sei tuir izame nasional hamutuk 300 resin husi siensia sosiais sala 6 no siensia naturais iha sala 3.
“Agora parte administrasaun prepara hela alunus sira nia kartaun izame inklui rekolla dokumentus sira,”nia hateten.
Maske nune’e nia dehan iha materia balun mak seidauk fo kompleta ba alunus sira e sira sei esforsu aan nafatin nune’e antes tama ba izame nasional bele kompleta materia hirak ne’e.
“Iha Sabado mestre sira aumenta tan atividade aprendizajen tambahan (les) ba alunus sira,”nia informa.
Kona-ba materia hirak ne’ebe sei tama iha izame nasional, Diretor ne’e hatutan, nia duvida atu alunus sira bele responde hotu, tanba uza lian Portugues.
“Hau sente iha problema bo’ot tanba primeira vez ita utiliza lingua Portugues iha Ensino Sekundaria no lingua protugues lingua ne’ebe difisil, ne’eduni iha difikuldade barak tantu livru ou professores sira ne’ebe hanorin no konaba salas de exame ami hetan difikuldade duni maibe ami sei esforsu an atu terseiru ano la bele hetan difikuldade,”nia dehan.
Entretantu tuir estudante Ensino Sekundaria 4 Setembru Balide, Joao da Costa katak nia parte duvida katak bele preenxe hotu perguntas sira iha izame ne’e tanba ho lian Portugues.
“Difisil tanba ho lian Portugues,”nia katak.
Enkuantu estudante Melkianus Cabral, nia parte komesa halo ona evaluasaun ba material hirak uluk nian husi primeiro ano to’o terseiru ano nian. “Nune’e bele lembra fila-fali no hafasil ita iha izame nasional,”nia katak.
Kona-ba lian Portugues, “ami sente laiha problema tanba ami husi eskola primaria kedas aprende Portugues, ne’ebe ba ami ladun difisil,”nia dehan.
