Atu konese diak liu tan regras fundamentais ne’ebé iha instituisaun Falintil-Forsa Defeza Demokratika Timor-leste (F-FDTL) iha,kadetes F-FDTL foun sira obrigatoriumente tenke tuir formasaun durante tinan ida iha Sentru Formasaun Metinaro,Dili.
“Formasaun tinan ida ne’e la’os fasil,maibé todan tanba ne’e membrus foun sira iha obrigasaun atu partisipa formasaun ne’e to’o hotu, nune’e iha loron ikus labele sai vitima ba regras military nian no sai membrus F-FDTL ne’ebé professional iha futuru,”hateten Tanente Koronel Falur Rate Laek,semana kotuk iha Metinaro,Dili.
Tuir Falur, durante formasaun tinan ida ne’e, formandus sira aprende kona-ba area pratika, teknika, disiplina, organizasaun administrasaun no lideransa instituisaun nian hanesan regras fundamentais.
Kona-ba membrus sira ne’ebé la tuir formasaun to’o remata ka kontra regras durante formasaun, Falur hatan “sei prosesa tuir lei hafoin formasaun ne’e remata, iha tempu servisu mak la tuir regras ka kontra regras military nian no komete iha krimi grave, tuir imflasaun military nian sei hatam ba prizaun durante fulan ida,”nia dehan.
Nia hatutan, formasaun hotu-hotu iha nasaun ne’ebé de’it, formador sira iha obrigasaun atu kumpri regras military nian tanba formandus sira tenke tau aas disiplina military nian no hatudu profesionalismu iha terenu.
Kona-ba formandus sira ne’ebé la tuir formasaun kompletu sei hasai tuir criteria military nian ne’ebé estabelese tiha ona.
Enkuantu formadores sira ne’ebé fo formasaun ba formandus sira ho total 300 resin ne’e, alende husi instituisaun F-FDTL rasik mos hamutuk ho asesores Portugúes ne’ebé fo apoiu ba F-FDTL.
Entretantu bainhira koko konfirma asuntu ne’e ba iha formandus sira maibé lakonsege tanba laiha lina de kontaktu e antes tama ba formasaun, formandus sira labele kaer telemovél no tenke entrega hotu.
