Tuir Sekretariu Estadu Joventude e Desportu (SEJD) Miguel Manetelo katak Parlamentu Foinsa’e (PF) hanesan fatin atu prepara joventude sira hodi sai lideransa ne’ebe diak iha future.
“Membru Parlamentu Foinsa’e sira so hetan formasaun, sira tuir kursu, tuir estudu komparativu hodi kesi liu tan sira nia aan hanesan lider ida iha sira nia Distritu,Sub-distritu,iha suku, iha sira nia bairo e ikus mai sai lider iha nasional,”hateten SE.Miguel Manetelo, semana kotuk (23/09) iha nia knar fatin Sional,Lesidere–Dili.
Nia hatutan,iha PF membru sir abele konese malu ho diak liu tan, sir abele aprende buat seluk ne’ebe sira lahetan iha sira nia eskola,liu-liu halo debate kona-ba isu ruma hanesan mos deputadu sira iha Parlamentu Naisonal.
“Ita promove sira nia valores ne’ebe sira hetan uiluk iha sira nia suku laran liu husi parlamentu foinsa’e, sira bele konese malu diak liu tan, e ha’u fiar katak sira sei hetan juara iha sira nia eskola, tanba sira iha ona esperiensia, aprende oinsa halo debate ba asuntu ruma,”nia esperansa.
Entretantu tuir Xefe Advokasia no Formasaun Comisaun Nasional Joventude Timor-leste (CNJTL) Manecas Lobo dos Santos katak hafoin partisipa iha plenaria, membru PF sira sei lori rezultadu ne’e hodi ba informa fila-fali iha joventude sira iha distritu ida-idak.
“Hanesan mos OJE bainhira kuandu Parlamentu sira aprova ka hanesan lei ruma ne’ebe iha Parlamentu sira debate, sira ba hato’o fali iha sira nia Distritu ba sira nia maluk foin sa’e sira ne’ebe vulneravel iha area rurais ne’ebe la hetan informasaun,”nia dehan.
Nia hatutan, informasaun saida deit mak PN halo debate, hanesan orsamentu jeral, tinan ida nian iha hira, gasta hira tenke ba hato’o fali iha sira nia distritu.
“ Sira nia dever mak tuir formasaun depois ida ne’e sira mos prepara materia ne’ebe sira hetan ba fahe fali ba maluk sira iha Distritu e sira rasik mos diskuti isu kona ba joventude nasional nian, sira halo draft tiha sira mos rekomenda ba parlamentu atu kria lei ruma ne’ebbe relevante ho asuntu joventude nian,”nia esplika.
Manecas afirma, durante PF harii, membru PF sira konsege rekomenda ona isu 8 ba iha PN mak hanesan isu kona-ba rai monu nian, hadomi ambiente, importasaun sasan ho kualidade, utilize internet, sigaru,no seluk tan inklui mos situasaun joventude sira iha arte marsiais.
