“Hau sente triste oituan tanba ami nia kolega sira ne’ebe hela fatin do’ok hanesan hela iha Comoro tenke mai fali hanorin iha Bidau,dalaruma sira mai tarde entaun atraza prosesu aprendizajen iha eskola,”preokupa profesores Bernardina de Sena semana kotuk (22/09) iha Bidau-Akadiru-Hun,Dili.
Mestra ne’e afirma, tuir orariu eskola tama tuku 08:00 maibe realidade to’o tuku 08:00 mos profesores sira seidauk iha tanba sira hela do’ok no prosesu aprendizajen la’o tarde.
“Ami tarde tanba kareta, e ami laiha transporte rasik tanba ne’e ho pasiensia mai hein kareta e dalaruma to’o eskola tuku 09:00 e prosesu aprendizajen la’o tarde,”nia katak.
Tanba ne’e nia parte husu ba Ministeriu Edukasaun atu hare ba kestaun ne’e, atu oins amak profesores sir abele hala’o sira nia knar ho diak liu tan.
“Hau hanoin diak liu mak profesores sira ne’ebe hela iha Comoro hanorin deit iha Comoro, sira ne’ebe hela iha Bidau mak hanorin iha Bidau, nune’e prosesu aprendizajen bele la’o ho efetivu no diak liu tan,”nia dehan.
“Ho kondisaun salariu ne’ebe minimu, loron ida sira gasta ba taxi $3,00(ba mai) e ita sura to’o fulan ida $183,00 entaun ami nia salariu ne’e hotu ba kareta nian deit,”.
Iha parte seluk Diretor Eskola Ensino Baziku Don Bosco Fatumaca, Jose Carlos sente triste ho kondisaun profesores tanba profesores balun hela iha Baucau mak ba hanorin iha Fatumaca.
“ Hau sente triste tanba kondisaun profesores sira nian agora ne’e ministeriu la dun tau konsiderasaun tanba salario ne’ebe ami simu ne’e la dun sufisiente ba ami nia nesesidade lor-loron nian, “nia preokupa.
