Estudante Universidade Nasional Timor Lorosa’e (UNTL) Fakuldade Agrikultura ho inisiativa rasik fo ajuda solidariedade ba vitima konflitu iha sub-distritu Zumalai, Distritu Covalima.
“Ami ajuda fos saku 159, mina bimoli dos 5, supermi dos 182, sabaun dos 12, rinso 16, kadernu dos 2, lapijera dos 2, kaneka lusin 94 (94 lusin) , kanuru lusin 94, bikan masa (plastic) lusin 97, balde 134 pasang, masin-midar ½ karung, biscuit dos 6, mina manas dos 12 no masin ½ dos,”hateten porta voz estudante Fakuldade Agrikultura Izac Gama semana kotuk (19/09) iha kampus UNTL,Dili.
Tuir nia, ajuda sira ne’e hanesan atu kompleta deit sira nia nesesidade baziku ne’ebe mak sira infrenta hafoin konflitu ne’e.
Total osan ne’ebe sira hetan husi asaun solidariedade no sosa sasan sira ne’e hamutuk US$ 870,00. “Osan ne’e la’os ami hetan deit husi instituisaun balun maibe ami mos fo ami nia kontribuisaun tuir ida-idak nia kapasidade,”nia esplika.
“Sasan sira ne’e iha tempu badak nia laran ami sei lori ba Zumalai hodi fornese ba ita nia mau alin no ita nia inan-aman sira ne’ebe hetan situasaun hamlaha iha ne’eba,”nia katak.
Entertantu Elia da Costa Araujo esplika katak, nudar sidadaun Timor leste nian iha obrigasaun atu fo solidariedade ba malu.
“Ami halo solidariedade ne’e durante semana ida nia laran ,hahu husi Segunda to’o iha Sexta ,maibe to’o agora sei iha difikuldade mak transportes,”Elia dehan.
