Edifisiu Parlamentu Nasional (PN) ne’ebe tuir planu sei halo iha Tasitolu besik statua Amo Papa Joao Paulo II nia sorin, oras ne’e dadaun preparasaun la’o hela.
“Ami prepara tiha orsamentu jeral 2011 nian ho montante 5 milioens dolares Amerikanu atu loke dalan sa’e ba leten,”hateten Deputadu Arao Noe, semana kotuk (26/09) iha Uma Fukun Dili.
Tuir Deputadu husi bankada Congresu Nasional Rekonstrusaun Timor (CNRT) ne’e katak, orsamentu ba halo edifisiu foun ne’e, orsamentu husi Parlamentu nian ne’ebe tama iha fundu infraestrutura ne’ebe jere husi governu e tinan ne’e bele realize.
“Orsamentu 5 Miloens ne’e tau iha fundu infrastruturas para halo perparasaun ba terenu,dezenu para komesa halo tender hodi halo konstrusaun ba edisiu Parlamentu foun ne’e, e orsamentu 2012 nian sei aumenta tan para komesa halo konstrusaun,”Aráo esplika.
Nia afirma, tuir previzaun konstrusaun ba edifisiu parlamentu foun ne’e han tempu tinan rua ka tolu mak foin bele hotu.
Entertantu Deputadu Manuel Tilman hateten,orsamentu ba konstrusaun edifisiu foun PN ne’e tama iha fundu infraestrutura nian.
“To’o agora ne’e sei identifika hela rai e prepara hela planta projetu maibe seidauk aprova,”nia katak.
Tilman hateten ,edifisiu parlamentu foun ne’e tinan ne’e sidauk bele realiza I husik ba parlamentu foun .
“Hau hanoin ita husik hela ba Parlamentu foun se la’e sira foun mai ne’e basa liman kedas ba uma foun ne’e ,ne’ebe tenke servisu mak uma foun,”Tilman tenik.
Enkuantu deputadu Francisco Branco husi bankada opojisaun hateten ate agora sidauk iha avansa ruma ba edifisiu ne’e.
“Ida ne’e mandate 2012 mak sei tau kestaun ida ne’e tanba lezislatura ida ne’e la iha tempu ona,”Branco dehan.
Branco espera katak, iha terseru lejislatura foun mai mak bele estabelese edifisiu parlamentu foun ne’e.
