Relasiona ho folin fos inklui sasan nesesidade baziku ne’ebe kuaze ke lor-loron sa’e be-beik iha lojaz no merkadoria halo komunidade sira iha Dili laran liu-liu povu kbi’it la’ek sira dada iis bainhira atu sosa fos saka ida.
“Ami hakarak husu deit ba Governu atu kontrola folin fos tanba ita hare loron ba loron folin fos aumenta ba bebeik deit ,halo ami povu ki’ik la iha kapasidade atu sosa,” preokupa komunidade Lesidere,Angela da Costa semana kotuk (21/09) iha Lesidere,Dili.
Angela mos kestiona kona-ba implementasaun lei kriminaliza folin sasan ne’ebe to’o agora governu seidauk implementa “Nusa mak governu seidauk implementa lei ne’e, sira dehan atu normalize hikas folin fos no sasan nesesidade sira seluk maibe realidade folin kontinua sa’e,” nia kestiona.
Angela mos observa katak folin fos sira iha Dili laran, husi negosiante ida ba negosiante seluk fa’an ho folin ne’ebe diferente.
“Tanba ne’e dala ida tan ami husu ba governu atu kontrola lalais folin fos sira ne’e nune’e negosiante sira labele aumenta folin tuir sira nia hakarak,”nia sujere.
Entertantu vendedor nuu laloir iha area Lesidere ne’ebe lakohi publika nia identidade hateten, folin folin ne’ebe sa’e maka’as iha merkadoria halo sira dada iis tiha. “Ami labele sosa tanba la iha kbit atu sosa,”.
Tuir fonts ne’e, dala barak folin fos sa’e tanba negosiante sira mak hakarak hasa’e duni. “Entaun halo ami povu ki’ik sira ne’ebe mak rendimentu la iha oinsa ami bele sosa netik saku ida hodi bele sustenta ba ami nia uma laran,” nia preokupa.
Enkuantu bainhira jornalista koko konfirma asuntu ne’e ba iha Diretora Seguransa Alimentar Florentina Smith maibe lakonsege tanba okupadu.
