Kondisaun ekonomia la favoravel halo labarik idade ki’ik iha Dili laran abandona sira nia eskola hodi halo fali atividade fa’an sasan ema bo’ot nian iha dalan ninin.
Tuir Manager Monitorizasaunba Direitu Umanus, Yayasan Hak, Xisto do Santos, nia preokupadu tebes ho realidade ida ne’e maibe nia apela atu la bele dun kulpa ba alin sira ne’ebe mak la iha oportunidade atu ba eskola.
“Ida ne’e kulpa husi estadu no sosiedade liu-liu ba ema ne’ebe autor lori foti desizaun politika ba kestaun refere,” hateten Manager dos Santosl iha nia knar fatin iha Farol, Dili, semana kotuk (17/09).
Nia mos akuza Estadu tanba la fo prioridade ba Edukasaun no katak ida ne’e Estadu nia obrigasaun atu kumpre atu garante kondisaun ba labarik sira ne’ebe ho idade ki’ik atu la sai hosi eskola no sira nia edukasaun.
“Hau hanoin katak se enkuantu labarik la iha osan duni atu kontinua sira nia estudu entaun parlamentu tenke buka medidas oinsa bele kolabora ho governu para governu bele fó subsidio ruma ba labarik sira ne’e para kontinua sira nia eskola,” haktuir Manager dos Santos.
Iha parte seluk Komisaria Direitus Labarik, Adalgiza Ximenes, hateten governu tenke halo aproximasaun ba labarik sira nia inan aman para inan aman sira dudu labarik sira ba no kontinua eskola.
“Estadu presiza iha politika ida ne’ebe di’ak hodi tau matan ba labarik sira ne’ebe abandona sira nia eskola,” hateten tan Komisaria Ximenes.
Julio (apelido la fo sai) ho tinan 12 anos katak komesa ki’ik to’o agora, “hau la eskola tamba osan la iha lori ba eskola ho ida ne’e mak hau fa’an sasan de’it iha dalan ninin.”
