Tuir Profesora Eskola Primaria Farol, Filomena Fatima Belo Freitas katak kompara labarik ne’ebe hela ho ema seluk no hela ho inan-aman rasik, labarik hela ema badinas liu.
“Hau hanoin labarik hela ho ema seluk ou atan ba ema seluk (pembantu) 100% sei hetan susesu tanba bad inas servisu enkuantu labarik ho inan-amana rasik, hetan susesu 50% deit iha futuru,” hateten profesora Filomena Fatima Belo Freitas semana kotuk (20/09) iha Farol,Dili.
Tuir nia, labarik ne’ebe hela ho inan-aman rasik dalabarak malandru liu, nakar, maldisiplina, baruk ten e defisil atu sai diak iha futuru.
Maske nune’e, nia rekonese katak la’os labarik hotu-hotu ne’ebe hela ho inan-aman hahalok ladiak maibe balun mos iha disiplina ne’ebe diak “depende ba edukasaun iha uma laran husi inan-aman sira, inan-aman tenke kontrola hahalok oan sira nian lor-loron.”
Hanesan inan-aman iha uma, iha eskola mos mestre/a sira hanorin la ho violensia maske sira nakar. “tanba nudar profesora ami nia knar mak eduka ema sai ema ne’ebe edukadu, la’os eduka animal,” nia katak.
Entretantu tuir Domingos California, nudar aman ida katak labarik hela ho inan-aman iha diferente hahalok ho labarik ne’ebe hela ho ema seluk (pembantu).
“Labarik ne’ebe hela ho ema seluk, badinas servisu,disiplina, iha komportamentu diak no sira kuaze ke laiha tempu atu halimar, mas sira ne’ebe hela ho inan-aman, sira dalabarak manha liu, nakar tanba hetan domin maximu husi inan-aman,” nia katak.
Tuir nia, maske nune’e inan-aman labele baku oan sira ho arbiru bainhira sira nakar maibe tenke ho liafuan.
“Hau nudar aman sekarik hau nia oan nakar ou malandru hau bele siak ho ibun atu hanorin sira maibe istima ho fuan laran tanba ne’e hau nia oan,” nia katak.
