Traballador Timor oan hamutuk ema na’in 17 ne’ebe desloka ba Korea du Sul ho triste tanba la iha seremonia despedida husi embaisador Korea do Sul no Sekretariu Estadu Formasaun Professional e Empregu (SEFOPE).
“Ami nudar trabalhador senti triste oituan tanba la iha mensajen ruma husi Governu no embaisada Korea nian wainhira ami desloka ba ema nia rai,” hateten traballador Mario de Jesus, semana kotuk,(13/09) iha aero portu Comoro,Dili.
Nia dehan,sira ba servisu iha Korea du Sul la’os deit ba privadu maibe reprezenta nasaun Timor nian iha ema nia rai.
“Ami husu ba maluk sira katak, ami ba servisu iha Korea la’os servisu ami nia an deit maibe ami ba halo promosaun Timor-leste nia naran iha Korea, e bainhira fila mai ami sei aplika skill ne’ebe ami hetan iha ema nia rain,”nia dehan.
Sentementu hanesan hato’o husi traballador Moizes Nazaret katak nia parte mos senti triste tanba laiha liamenon ruma husi governu TL no governu Korea liu husi sira nia embaixada.
“Maske triste maibe ami senti kontenti oituan tanba ami ba ema nia rai la’os ba mesak la’o nafatin ho sira,” Moizes dehan.
Traballador ne’e dehan, orsamentu ne’ebe mak sira uja ba Korea du Sul balun empresta banku nian no balun uja nia osan rasik.
“Ami foti osan husi banku ami tenki halo jaminan ho banku,“Nazaret nia.
Entretantu tuir traballador Joel Imanuel Nunes, katak maske Governu Timor-leste no Embaisador Korea du Sul la iha fatin hodi fasilita sira ba Korea du Sul maibe sira pronto aranka ba Korea du sul.
“Hau hamutuk ho hau nia kolega prontu atu ba servisu iha Korea du Sul tanba nudar traballador tenke prontu atu nune’e bele servisu ba nia an no ba nasaun ninian,”nai dehan.
‘’Ami hamutuk sanulu resin hitu ne’ebe mak ba Korea ne’e iha area keta ketak ,ba hau area elektronik,”nia katak.
