Liu hosi tasi ibun uluk konhese nudar ‘Dollar Beach/Praia do Dolar’ iha dalan ba Manaturo agora karik presiza hanaran foun ‘Millions of Dollars Beach/Praia dos Milhares de Dolares’ tanba se uluk ita kwandu liu hosi fatin turistiku ne’e ita hakfodak ho beleza natural fatin ne’e, oras ne’e ita kwadu liu hosi fatin ne’e ita nia emosaun seluk fali: la fiar ida, desiluzaun no frustrasaun no mos ita la bele komprense oinsa mak ‘asidente’ ida hanesan ne’e bele akontese.
No hosi parte ida ita mos bele komprende frustrasaun no akuzasaun hosi Membrus Parlamentu Partifu FRETILIN ne’e akuza governu inkompetensia atu lidera dezenvolvimentu nasional. Frustrasaun ne’ebe Deputadu hirak ne’e espressa ami hanoin ema hotu ne’ebe liu hosi fatin ne’ebe jerador oliu pezadu monu mos senti.
Perguntas bo’ot ida mak oinsa ba asidente ne’e bele akontese?
Primeiru tanba tuir lojika molok atu koko lori jerador todan ho toneladas 250 tenki ser halo assessment ida klehan kona ba opsaun saida mak diak liu atu transporta jerador todan nuner hosi portu temporario iha Behau ba iha Sentral Elektrika Hera nian.
No mos presiza ema matematiku ruma ka sientista ruma atu halo kalkulo presizu kona gradiasaun no elevasaun foho, kualidade estrada, todan jeradors, traksaun kareta nia roda no askepktus tomak seluk tan atu determina bele ka la’e.
Tanba ho jerador pezadu todan toneladas 250 ho nia valor milhaun barak ita la bele koko deit mak ita hare’e bele ka la’e.
Hanesan ita hotu aprende valor lisaun ida ne’e katak ba buat hotu uza ossan estadu atu sosa presiza hanoin no halo planu uluk mak halo, nia kustu aa tebes.
Karik liu hosi investigasaun ba asidente ne’e ita hotu, publiku, bele hetan mos assessu ba rezultadu estudu preliminar ne’ebe halo molok koko lori jerador foun ne’e ba Hera, atu nune ita mos bele hare’e halo nusa mak desizaun ne’e halo no ita bele aprende para la bele repete tan aban bainrua.
Agora kona ba responsabilidade se nian lolos? Ami koko husu no balun hatudu ba Sekretariu Estadu Eletrisidade Agua no Urbanizasaun, Januario Pereira, no seluk hatudu fali ba Sekretariu Estadu Infrastrutura, Domingos Caero, no seluk tan dun sala ba kompanhia ne’ebe halao transporte jerador nian. Kan ita dun sala deit ba governu tanba sira kaer responsabilidae jeral kona ba hahalok ninian elementus.
No mos tristi tebes mak intrevista ho SE Januaru Pereira iha momentu asidente akontesi iha media televizaun no nia atitute kasual tebes wainhira nia hateten katak ita hotu lalika preokupa tanba iha tan jerador seluk ne’ebe ita bele haruka deit ba atu truka ida ne’ebe monu.
Ho respeita tomak Sr. SE Pereira resposta diak liu mak ita halo lai investigasaun no estudu klehan ida atu determina sala iha ne’ebe para la bele akontese tan selai lori tan deit jerador seluk atu ba monu tan iha ne’ebe?
Sr SE mos nafatin promete katak ahi sei laka tuir promessa uluk nian iha Novembru tinan ne’e. Hanesan mala’e sira koalia: Fingers Crossed! Tanba ema hotu kole ona ho kondisaun ahi mate piska-piska tinan sanulu resin hafoin independensia, no ema hotu hakatak deit mak eletrisidade normal.
