Governu Australian no Nova Zelandia liu hosi sira nia Embaixadores ba Timor-Leste anunsia naran Timoroan 45 tan ne’ebe simu bolsa de estudu atu hasai kursu fomal iha instituisaun universitario iha rai rua ne’e kona ba areas dezenvolvimentu no lideransa nian ba tinan 2012.
Estudantes nain 45 ne’e sei hetan oportunidade atu hasai kursu iha nivel Baixarelatu ka Lisensiatura, Mestradu no mos Doutoramentu.
Iha okazisaun anunisio ne’e (14/9) iha Dili, Embaixador Australia nian ba Timor-Leste, Miles Armitage, hateten katak estudantes hirak ne’e sei hetan oportunidade diak ida atu kontinua sira nia estudu no hasa’e sira nia matenek atu bele wainhira fila fali mai Timor-Leste fo kontribuisaun maksimu ba dezenvolvimentu rai laran nian.
Embaixador Armitage mos hateten katak hetan bolsas de estudo ne’e mos sei halao rai rua ne’e besik liu tan liu hosi relasaun pesoal ne’ebe sei dezevolve ente ema Timor no ema Autralia nian.
“Nune’e mos loron ne’e loron ksolok ba Timoroan no Australianus sira tanba liu hosi bolsu estudu ne’e povu rai rua ne’e bele hametin liu tan sira nia relasaun pesoal,” hateten Embaixador Armitage.
Entretantu Ministru Edukasaun, Dr. Joao Cancio Freitas, ne’ebe nia rasik mos alumni ba Australian Development Scholarships (ADS), hateten katak nia orgulho ho relasaun diak ho nasaun Australian no Nova Zelandia liu hosi inisiativa ne’e no reaforsa Timor-Leste nia hakarak atu hametin tan parseria ne’e ba oin, “nudar parseria dezenvolvimentu ho valor aas tebes.”
Ministru Freitas haktuir tan katak desde 2000 matenek nain Timoroan 224 fila ona mai hosi estuda iha Australia no Nova Zelandia liu hosi inisiativa Australia no Nova Zelandia Development Scholarships nian. Nia hateten tan katak 61 pursent kompleta ona sira nia estudus, 35 pursentu sei kontinua hela, no pursent 4 deit mak la konsegue ramata sira nia programa akademiku.
Iha okaziaun hanesan Embaixador Australia no Nova Zelandia nian mos anunsia kona ba Faze II atu suporta ba Governu Timor-Leste nia Programa Estajio (GGIP) lidera hosi Komisaun Servisu Publiku. Liu hosi GGIP governu Timor-Leste hetan fundus atu bele fo estajia ba graduadus hosi ADS no NZDS wainhira fila mai Timor-Leste ba fulan 12.
Prezident Komisaun Funsaun Publika, Liborio Pereira, iha okaziaun ne’e hateten katak prioridade ida ba Governu Timor-Leste mak atu dezenvolve rekurus umanus Timor-Leste nian. “No [GGIP] oportunidade ida diak atu kaer Timoroan ne’ebe hetan oportunidade atu sai professional liu iha Australia no Nova Zelandia atu bele servisu iha Governu.”
Prezidente KFP Pereira hateten tan katak tuir governu nia Planu Kapital Humanu sei buka dala atu aumenta tan ba inisiative ne’e no katak iha tempu badak nia sei koalia ho parseirus liu liu Australia atu halo oinsa bele harii prosesu ne’e.
