Povu vendedor ki’ik sira iha merkadu Hali-laran, husu ba Governu, liu hosi nia orgaun kompetente, atu toma medida ba sistema ruma hodi asegura no valoriza produtu lokal sira iha merkadu no mos ba padraun hijiene iha merkadu ne’ebe iha nia laran rasik atu nune bele dada mos ema ho ossan ka ema bo’ot atu la hola sasan iha merkadu laran.
“Povu ki’ik sira mak mai sosa, tan ne’e maka fa’an to’o tiha kalan mos lahotu, ami tenke duni hela de’it lalar. Nune’e to’o kalan, liman sai moras. Ema osan bo’ot sira no ema bo’ot sira nunka mais atu hola ami nia produtu sira ne’e. Dala ruma tanba laiha limpeza maibe ne’e kompetensia Guvernu mak tenke kontrola hodi tau netik kondisaun ruma ba ami vendedor,” hateten vendedor na’an, Jose Mautersa, iha Merkadu Hali-Laran, Taibessia, Dili, semana kotuk.
Nia haktuir katan folin ba na’an depende ba animal. “Na’an nia folin dolar nen ba kilo ida, tanba ami haree husi karau. Fahi iha baze sa’e maka’as tebes. Ho folin dolar atus hitu ka atus ualu ba karau Timor no vaka, dolar atus lima ka atus nen ba fahi no mos la sura ho transporte.”
Vendedor Na’an ne’e hatutan tan katak ba sira nudar vendedores ki’ik iha merkadu dala ruma rendimentu menus liu nune sira tenki fa’an to’o kalan. Depois na’an lori ba uma halo dadain maran ba uma laran mak han de’it.
“Rekomenda ba Guvernu hodi hadia kondisaun hijieni no hadia sistema hodi tau as produtu lokal iha nivel merkadoria no fó hanoin sidadaun ida-idak hodi konsentra ba dependensia aihan rai laran.”
Maibe wainhira dada lia ho sira vendedor balu mak hanesan Jose Mautersa fa’an na’an,Isabel fa’an modo tahan, Tetilebo fa’an koto no fehuk rop, Namonika fa’an fehuk midar, talas,aifarina no hudi sira.
Vendedora seluk ida tan mos iha Markadu Hali-Laran, Isabel, hateten nia tenki obriga aan fan nia modo ho folin aas oituan, dolar ida ba futun ida maske kiosk balun faan deit ho 50 sentavus. “Hau fa’an nune’e tanba la os kuda rasik maibe hola tutan ba dala rua husi ema. Ami hakarak kuda rasik, maibe iha Dili laiha fatin atu kuda modo. Iha distritu rai luan mai iha ne’e tan de’it situasaun, mak to’o Guvernu seidauk tau matan ba ami hodi fila ba knua rasik.”
Vendedores sira mos keixa kona ba folin sasan waihira sira sosa tuba no transporta hos distritus mai iha kapital; kompara folin ohin loron ho folin tinan hirak liu ba.
“Fehuk ropa isin bo’ot ha’at dolar rua, ki’ik isin nen dolar ida. Koto sasukat susuben enak nia fatin dolar ida, kompara ho tina rua ka tolu liuba, sasukat susuben tolu to’o ha’at dolar ida. Agora ami ba hola, distritu mai kareta selu karun tebes tanba krize mina sa’e maka’as hodi fo impaktu ladiak ba ami vendedor sira; sai vitima tanba nain selu ketak sasan selu ketak,” hateten vendedor Tetilebo.
Relasiona ho keixas ne’ebe hato’o hosi vendedores Hali-Laran, liu liu kona ba hijiena iha merkadu laran, Ministry Ekonomia no Dezenvolvimentu, Joao Gonçalves, hateten katak Governu iha hela vizaun no planu kontinua atu hadia sistema iha merkadoria no mellora kondisaun sanitaria ba futuru.
“Maibe tenke lai prepara uluk povu nia koñesimentu no mentalidade hodi utiliza rekursu de instalasaun sira ne’e,” haktuir Minitru Gonçalves.
Ministru ne’e fo ezemplou hanesan Merkadu Taibesi nune Estadu investe fundus montante bo’ot atu hadia merkadu ne’e maibe to’o ohin loron vendedor la uza fatin ne’e no mos la tau matan ba edifisius merkadu laran nune’e to’o ikus ema sobu haris fatin, baku rahun meza leten, no estranga fasilidades ne’e.
Nia haktuir kata governu sei presiza prepara lai edukasaun sivika ba vendedores no komunidade em geral, “hodi nune’e Governu la sei soé osan saugati de’it.”
