Francisco Amaral, nudar ema joven Timoroan moris ho defisiensia durante tinan barak hateten nia la asesu masimu ba edukasaun tanba Governu seidauk tau atensaun diak ba edukasaun ba ema ne’ebe moris ho defisiensia, liu liu joven sira.
“Hau lakonsege remata eskola, to’o SMP deit para tiha tanba impaktu husi ha’u nia moras,” hateten Francisco.
Maske Parlamentu Nasional ratifika ona konvesaun fo diretu fundamental ba ema moris ho desabilidade sira atu asesu iha parte hotu–hotu, joven defisensia seidauk asesu masimu ba edukasaun.
Franscisco husu ba Governu atu fo atensaun ba moris joven sira ne’ebe iha defisiensia ka dezabilidade ruma.
Entretantu Organizasaun Naun Governamental (ONG) Asosiasaun Hi’it Raes Timor Timor (ASSERT), Alexandre Morais, nudar Manager Administrasaun NOG ne’e nian hateten ASSERT kopera ho Ministeriu Edukasaun hodi kria edukasun inklusivu ba defisentes atu ba eskola normal hanesan ema bain-bain no sira mos tenta nafatin halo diskusaun ho Professores sira iha eskolas ne’e atu integra defisentes sira iha sira eskola laran.
Nia haktuir mos katak kondisaun dezabilidade fizika dala barak la signifika katak ema ida nia hanoin mo afeta maibe issin deit.
“Ami agora kopera ona ho Ministeriu Edukasaun liu husi Edukasaun Inklusivu atu ne’e ita la bele bolu tan eskola espesial tanba ne’e hanesan diskriminasaun ida katak desabilidade sira ne’e laos hanoin mos defisinte maibe isin de’it,” hateten Manager Morais.
Iha parte seluk Prezidente Komisaun H, Parlamentu Nasional, ne’ebe trata asuntu joventude, desportu no formasaun professional, Antonio Cardoso, hateten juventude barak mak defisentes tanba funu no natureza duni. No nia hateten mos katak iha nasaun ne’ebe dezenvolvidu ema sempre fo atensaun ba ema moris ho dezabilidade sira.
“Defisensia iha direitu tomak atu hetan protesaun ba sira nia moris. Tanba nu’udar sidadun koalia kona-ba edukasaun defisensia sira iha direitu fundamental para atu bele proteze sira nune’e iha ekilibriu ida entre ita nia direitu no dever,” hateten Deputadu Cardoso.
Hosi parti direitus humanus nian, tuir program advocasia direitu umanus Yayasan Hak hateten governu no parlamentu tenke tau atensaun masimu ba ema dezabilidade sira tanba sira iha direitu fundamental hanesan sidadaun ida oinsa bele asesu ba edukasaun.
