Dezempregu ba populasaun joven iha Timor-Leste sai aas tebes desde tinan 2010 tanba kampu de trabalho menus liu iha rai laran atu akomoda populasaun joven.
Tuir Jose Amaral, ne’ebe foin remata nia edukasaun sekundaria, no agora dezempregadu hela, governu mak la kria kampo de traballu ba jovens, no halo ema barak sai vitima ba dezempregu.
“Ita nia governu mak la kria kampo de traballu, tan ne’e mak fo impaktu bo’ot ba povu Timor tomak. Povu mak sai vitima ba dezempregu nian, entaun husi ida ne’e bele produs numero dezempregu nian aumenta ba beibeik, no husu ba governu sira katak tau matan mos ba buat sira ne’e hotu”, dehan nia.
Iha parte seluk, tuir membru komunidade, Leontino Mendonça, ne’ebe hanesan mos dezempregadu ona durante tina rua no to’o ohin loron seidau konsegue hetan servisu haktuir katak moris hanesan dezempregu ne’e iha ninia di’ak no mos ladi’ak.
“Tuir hau nia prespektiva katak moris hanesan dezempregu ne’e iha nia di’ak no ladi’ak. Ninian di’ak mak hanesan ita lao badiu tun sa’e tuir ita nia hakarak, mas nia ladi’ak mak hanesan ita nudar sidadaun ne’ebe la vale ba ita nia nasaun ne’e persiza servi ba nasaun ida ne’e.”
Tuir estatisktika ne’ebe iha totalidade jovens la servisu rejista hosi Sekretaria Estadu Formasaun Profissional no Emprego (SEFOPE), ho total 7.000 (4000 mane no 3000 feto).
Tuir Xefe Tékniku SEFOPE, Alarico Fernandes, instituisaun ne’e ninian objetivu principal mak atu prepara no hasa’e kapsidade rekursu humanu Timoroan ba futuru.
“Ami nia objetivu principal mak tau matan no prepara no mos atu hasa’e kapasidade rekursu humanu ba Timor oan sira tomak ba servisu, tuir nesesidade ne’ebe ita nia nasaun ne’e presiza”, hateten Xefe Fernandes.
“Joven sira ne’be la servisu, hirak ne’e mos depende ba skill [abilidade], maske akaba universidade mas la iha skill entaun la vale buat ida. Atu aumenta skill hirak ne’e ami husi instituisaun SEFOPE prepara atu maneja buat sira ne’e hotu,”haktuir nia.
