“Agora ita iha ona ba meadu de Setembru ,e falta fulan tolu deit oinsa sira bele ezekuta osan hirak ne’e,” preokupa Deputadu Inacio Morera , semana kotuk,(12/09) iha Parlamentu Nasional.
Tuir Inacio, to’o 31 Dezembru mak orsamentu jeral du estadu la konsege ezekuta hotu tenke fila fali ba kofre estadu nian.
“Koalia kona-ba fundu infrastrutura Governu ida ne’e mak la iha kapasidade atu ezekuta ,maibe hau tauk deit mak bainhira ano fiscal ne’e hotu hakfodak mai osan la konsege ezekuta hotu no la konsege halo relatoriu mai entaun osan ne’e sira gasta arbiru deit,”Inacio dehan.
Tanba ne’e Fretilin sei la nonok ,e husu nafatin oinsa bele alokasaun orsamentu jeral du estadu bele ezekuta hotu.
Nia hatutan, relatoriu ezekuzasaun orsamentu husi Ministeriu Infraestrutura seidauk hatama iha Parlamentu to’o agora. “Sira foin hatama deit primeiru trimester nian maibe hau diskunfia relatoriu ne’ebe mak sira hatama, tanba laiha rezultadu, sira halo saida, halo iha ne’ebe,”nia dehan.
Alende ne’e tuir komunidade Bonifacio da Conceiçao katak maske tinan-tinan parlamentu aprova orsamentu ho montante bo’ot maibe la hatudu rezultadu ne’ebe signifikadu. “Ahi kontinua mate estrada aat iha fatin-fatin no komunidade kontinua la asesu ba bee moos,”nia preokupa.
Tuir nia, uluk bis halai ba Baucau oras rua deit maibe agora halai oras hat to’o lima nia laran mak foin to’o.
“Tanba uluk estrada diak ,maibe agora ita hare estrada kuak ba bebeik deit nunka hadia, “Bonifacio preokupa.
