Tuir Prezidente Sindikatu Professores Timor-Leste (SPTL), Julio dos Santos, salariu ba professores sira iha territorial nasional tomak bele ona aumeta hahu iha fulan Setembru ne’e ba oin.
Nia hateten katak preokupasaun bo’ot ida ba professores tomak iha territoria mak sira nia salario ne’ebe la bele aumenta uluk tanba Ministerio Educasaun sei hein hela despachu hosi Conselhu Ministrus, kona ba aprovasaun rejime kareira.
“Hau lamenta teb-tebes ho salarius ba professores sira ne’ebe mak to’o agora seidauk aumenta,” SPTL nia Prezidente dos Santos, semana kotuk hosi nia eskritorio iha Farol, Dili.
Tuir Vise-Ministru ba Edukasaun, Paulo Assis Belo, Konsellu Ministrus aprova ona mudansa ne’ebe halo ba diploma ministerial númeru 13/ME/2011 ne’ebe ko’alia kona-ba salarius no kriterius atu bele tama iha regime karreira professores iha fulan kotuk Agostu foin liu ba.
“Governu esforsu maka’as ona hodi implementa no aprovasaun husi konsellu Ministru iha loron 3 fulan Agustu tinan ida ne’e,” hatete Vice Ministru Assis iha nia servisu fatin Ministeriu Edukasaun, iha Vila Verde, Dili, semana kotuk (2/09).
Vice-Ministru mos hateten katak Komisaun Funsaun Públika hamutuk ho Ministeriu Finansas hala’o agora daudauk analiza ba prosesu professores sira nian atu konfirma no valida dokumentus professores nian hodi hahu prosesu pagamentu.
Vice-Ministru Belo iha fatin hanesan hussu mos ba professores hotu atu pasiensia hodi hein prosesu aumenta sira nia vensimentu no apela ba professores sira atu hala’o didiak knar no dever nudar edukadores no mos atu frekuenta nafatin formasaun ne’ebe Ministeriu Edukasuan fó no implementa ne’ebe hasai husi Ministeriu Edukasaun hodi promove kualidade edukasuan iha Timor-Leste.
Professora Maria Fatima, ne’ebe hanorin iha Eskola Sekundaria 4 de Setembru, apela mos ba Ministeriu Edukasaun atu hasa’e ona professores sira nia vensimentu.
“Governu aprova ona regime karreira ba professores, nune’e Ministeriu Edukasaun tenke hasa’e ona salarius professores,” hateten Professora Fatima.
Maibe kona ba formasaun ba professores ne’ebe fó husi Ministerio Edukasaun, Professora Fatima hateten husi nia parte sei nafatin frekuenta formasaun ne’ebe fó maske salariu seidauk aumenta.
