Atu fasilita servisu Sekretariadu Tekniku Administrasaun Eleitoral (STAE) nian iha distritu la’o ho diak durante eleisaun jeral 2012, STAE nasional entrega kareta 13 ba koordenador distrital iha distritu 13 nia laran.
“Viaturas ne’ebe ita bo’ot sira simu ne’e tuir regras sei la tau vidru metan no sei la halo modifikasaun,”hateten Diretor Jeral STAE Thomas Cabral semana kotuk (02/09) iha Kaikoli,Dili.
Tuir Thomas, kareta hirak ne’e tenke uza ho kuidadu, karik uza latuir termus mak sei dada mai iha nasional bainhira halo eleisaun mak haruka fali.
“Iha 2012 kada distritu iha kareta tolu ,tanba ne’e mak hau husu ba senhor kordenador sira tenke uza ho responsabilidade ba viaturas estadu nian, labele uza fin de semana ba atividade privadu nian,”nia husu.
Entretantu tuir Ministru Administrasaun Estatal Ordenamentu du Teritoriu (MAEOT) Arcangelo Leite katak kareta hirak ne’e fahe ba koordenador sira iha distritu atu sira bele servisu ho diak liu tan ba preparasaun eleisaun jeral tinan oin.
“Kondisoens ne’ebe mak Governu fo ne’e liu husi orsamentu ne’ebe mak preve ba 2011 ninian konaba transportes ne’ebe mak agora dadauk iha ita bo’ot sira nia oin,” nia dehan.
Tuir nia, iha prosesu eleisaun jeral 2012, STAE servisu hamutuk ho Timor Telekom hodi asesu ba iha internet iha distritu sira atu hato’o informasaun ruma ne’ebe la’o hela iha distritu.
“Nune’e kordenador sira iha distritu labele tun mai, e alende internet ita boot sira mos iha telephone ofisial nian,hodi fasilita ita nia servisu ho diak,”nia tenik.
“Atu hato’o deit informasaun ruma kona-ba rezultadu aktualizasaun baze de dadus, ita bo’ot sira presiza sirkula ba sirkula mai hodi gasta kombustivel ne’e hotu,”Ministru katak.
