Atu reforsa liu tan formasaun ba joventude sira iha kapasitasaun vokasional, Banku Dezenvolvementu Asia (ADB) ajuda Governu Timor-leste liu Sekretariu Estadu Formasaun Profesional e Empregu (SEFOPE) apoiu US$ 8,5 milioens ba Sentru Formasaun sira.
‘’Objetivu prinsipais mak atu reforsa estruturas no mos defini kona-ba politika padraun ba formasaun professional nian atu reforsa estrutura treinador professional nian,” hateten SE. Bendito Freitas, hafoin asina nota intendimentu ho ADB semana kotuk (06/09) iha Kaikoli,Dili.
Tuir nia, apoiu ida ne’e atu fo ekipamentus ba Sentru Formasaun Professional Don Bosco Comoro,Dili Institute of Tecnologi Baucau, no mos fo apoiu ba formadores sira ,Senai Becora inklui ba Sentru Formasaun Empregu Tibar.
“Liu-liu sei update mos fasiliidade iha Sentru Treinamentu iha Tibar, ba future sei loke mos dormitoriu kompleta ho dezenvolvementu infraestrutura, nune’e bele simu formador no treinador sira mai husi distritu bele uza,” Freitas dehan.
Entretantu tuir reprezentante husi ADB, Antonio Vitor katak asina akordu ne’e oinsa bele responde ba nesesidade Timor nian iha longu prazu.
“Apoiu osan ida ne’e la’os deit mai husi ADB maibe mos husi governu Timor tau hamutuk osan hodi finansia instituisaun ne’ebe fo treinamentu ba sira ne’ebe hakarak aumenta skill,” hateten Vitor.
Tuir nia, apoiu ida ne’e sei la para deit iha ne’e maibe sei kontinua iha future.
