Prezidente Komisaun Funsaun Publika (KFP) Liborio Perreira hateten oras ne’e dadaun Lei Reforma ba Funsiunariu Publiku nian aprezenta ona iha Konsellu Ministru no submete ona ba iha Parlamentu atu halo debate.
“Tinan oin it abele ona fo reforma ba ita nia funsiunariu sira hamutuk 1000 resin ne’ebe sira nia idade atinji ona,”informa Prezidente KFP, Liborio Perreira semana kotuk (07/09) iha nia knar fatin Colmera,Dili.
Tuir nia, iha proposta de lei reforma ne’e, funsiunariu publiku ne’ebe merese atu hetan reforma mak ho idade minimu 60 no masimu 65.
“Katak funsionariu ne’ebe mak atinji ona 60 anos voluntariamente bele husu reforma no atinji ona 65 anos iha obrigatoriu tama ba reforma,”Liborio dehan.
Prezidente KFP ne’e hatutan, maske nune’e lei reforma ne’e seidauk klaru tanba seidauk aprova iha Parlamentu Nasional,foin mak esbosu hela.
“Wainhira sira reforma,ita regula pensaun fo nafatin sira nia direitu hanesan pensionista maibe nia montante ne’e la hanesan ho ativu,”nia esplika.
Alende ne’e tuir membru Parlamentu Deputadu Francisco Jeronimo katak, governu rekonese ona husi funisunariu temporariu ba funsionariu permanente, e tempu to’o ona Governu bele fo reforma ba funsionariu tuan sira.
“Governu tenke reforma funsionariu sira ne’ebe tinan tama ona 60 anos ba leten e sira iha direitu atu bele deskansa,”nia dehan.
Iha fatin hanesan Deputadu Manuel Tilman hateten, lei reforma ba funsionariu publiku iha ona komisaun A no komisaun C nia liman hodi diskuti.
“Proposta de lei ne’e hanaran fo siguransa social ba funsionariu publiku sira ,iha ne’e mak fo reforma ba sira,”Tilman hato’o.
