Tuir Sekretaria Estadu Promosaun e Igualidade (SEPI), Idelta Maria Rodrigues katak feto foin sa’e ne’ebe droup out husi eskola no lakonsege akaba, iha oportunidade atu kontinua hikas sira nia estudu.
“Sim, sira iha direitu atu kontinua hikas sira nia eskola tantu iha nivel universidade no sekundaria,”hateten SE. Idelta Maria Rodrigues semana kotuk bainhira partisipa iha serimonia entrega cheque bolsu estudu nian husi Royal Thai embassy ba Fundasaun Alola (26/8) iha Mascarenhas,Dili.
Tuir nia, atu identifika feto hira mak sai sedu husi eskola, oras ne’e SEPI hala’o hela peskiza iha distritu tolu,Distritu Aileu, Ainaro no Distritu Liquisa.
Nia hatutan, rezultadu peskiza ne’e hatudu katak iha distritu 3 ne’e feto foinsa’e barak mak la konsege akaba sira nia eskola.
Bazea ba rezultadu ne’ebe iha, hatudu katak maioria feto foinsa’e la akaba sira nia eskola tanba situasaun ekonomia la sufsiente, hela dook husi hela fatin e mos tanba isin rua no buat seluk tan.
“Numeru lolos ami lahatene maibe iha rezultadu peskiza ne’e hateten feto barak mak sai husi eskola e lakleur tan halo lansamentu ba rezultadu peskiza ne’e,”nia dehan.
Tanba ne’e husu ba Ministeriu Edukasaun atu kria netik lei ida, nune’e feto foinsa’e sira ne’ebe la remata sira nia eskola bele kontinua fali.
“Ami orienta no fasilita deit maibe ministeriu edukasaun mak implementa,”nia katak.
Entretantu tuir Deputada Virginia Ana Belo, katak Ministeriu la presiza kria lei ida maibe presiza deit regulamentu ida ne’ebe bele aplika iha eskola hotu.
“ Hau hanoin la presiza halo lei maibe escola tenke tau regras ida no ministeriu mak hasai ninia diploma ministerial ida hodi haruka ba escola hotu atu nune’e labele halo lei ne’ebe bo’ot para atu regula fali buat ki’ik ida ne’e,” nia dehan.
Deputada ne’e konkorda bainhira feto foinsa’e sira ne’ebe la akaba sira nia eskola bele kontinua hikas sira nia estudu tanba sira hirak ne’e la remata eskola ho razaun oi-oin.
“Balun isin rua tanba ema mak perkosa, entaun nia sai tiha h usi eskola, balun tanba ekonomia no razaun seluk tan tanba ne’e presiza duni sira kontinua eskola to’ remata,”nia konkorda.
