Uluk kritika, agora halo tuir ona,”hateten Xefe Bankada Fretilin Aniceto Guterres Lopes bainihra halo kritika kona-ba bandeira partidu Congresu Nasional Rekonstrusaun Timor (CNRT) ne’ebe komesa dada iha fatin-fatin iha capital Dili.
Tuir nia, uluk dada bandeira partidu nian, so Fretilin mesak mak dada no hetan kritika husi partidu seluk hanesan partidu CNRT ne’ebe ikus mai halo tuir mos hanesan Fretilin.
“Hasa’e bandeira ne’e la kontra buat ida maibe uluk sira dehan ne’e kontra lei e agora sira mos halo tuir,”hateten eis defensor publiku ne’e, semana kotuk (05/09) iha PN.
Entretantu tuir Deputadu husi bankada CNRT, Arao Noe katak CNRT hasae nia bandeira atu komemora loron 30 Agustu nian. “bandeira ne’e sagradu, ita so bele hasa’e deit iha sede oin ne’e tuir lei hateten, la’os hasa’e iha ai tutun sira,”nia dehan.
Tanba ne’e tuir nia, hasa;e bandeira ida ne’e hanesan provizoriu deit “ami se lahusik ami nia bandeira dodok iha ai tutun, la hanesan Fretilin nian ne’ebe hasa’e iha ai tutun iha fatin-fatin to’o dodok tiha deit,”nia dehan tan.
Entretantu membru bankada Fretilin Francisco Jeronimo hateten, lolos CNRT labele halo tuir fali tanba uluk sira mak kritika maka’as.
“Tanba ne’e mak hau foti kestaun ne’e ba hau nia maluk sira ,imi dehan katak ami nia bandeira tau ne’eba la diak maibe agora imi nia bandeira mos dada diak fali ona,”nia kritika.
“Se kuandu ita dehan la diak mak halo fali ne’e hanesan retorika deit” nia dehan.
Tuir nia,loron 30 Agustu ne’e loron referendu nian la’os partidu CNRT nian. “CNRT ida historiku ne’e disolve tiha ona iha 2001 iha Gedung Matahari Terbit, ne’e hanesan manipulasaun hodi soe rai rahun ba povu nia matan,hau mos uluk vota ba CNRT maibe la’os ba partidu CNRT,”nia protesta.
