Tuir Membru Board Working Women’s Center Timor-Leste (WWCTL),Elisabeth Lino de Araujo katak sei luta maka’as hodi defende direitu feto servisu nain sira nune’e sira mos hetan tratamentu hanesan ho mane sira.
“Ami sei trata pontu importante balun ne’ebe sei sai luta ba aban bainrua iha WWCTL, liu-liu hodi hare direitu traballador feto tantu iha uma, iha servisu fatin atu oinsa maluk feto sir abele tratamentu hanesan ho mane iha sira nia servisu fatin,”hateten Elisabeth Lino de Araujo semana kotuk (01/09) iha konferensia WWCTL iha Arbiru Beach Hotel, Bebonuk Dili.
Tuir nia, kona-ba feto maluk balun ne’ebe servisu iha uma laran (Pekerja Rumah Tangga), sei hasa’e sira nia konesementu iha uma laran nian no tau sira nia kondisaun salariu ida ne’ebe diak maibe tenke bazea ba sira nia kapasidade.
Nia hatutan, WWCTL lakohi atu feto sai atan deit, tanba ne’e sei esforsu aan atu halo advokasia ba sira tantu iha uma, iha restorante, warung, loza sira inklui feto sira ne’ebe servisu iha hotel.
“tenke iha kontratu servisu nian, tanba ita hare durante ne’e sira servisu laiha kontratu ida ba sira,”nia afirma.
Alende ne’e WWCTL mos hare kontratu ne’e no tenke bazea ba lei traballador nian, katak loron ida servisu oras ualu (8).
“Ami sei husu ba emprezariu kompania sira no ema sira ne’ebe fo servisu ba feto sira atu labele halo diskriminasaun maibe trata feto hanesan ema, labele uza hanesan instrument maibe respeita sira nia pozisaun,”nia esperansa.
Nia afirma, maske la fasil WWCTL atu buat hirak ne’e maibe tenke koko atu hahu agora hodi luta ba direitu feto nian iha servisu fatin.
Enkuantu orsamentu atu hala’o programa ida ne’e, WWCTL hetan suporta husi USAID ho montante $75 mil ba durasaun tinan ida nian.
Entretantu tuir Anna Davis, reprezentante husi Universidade Charles Darwin-Australia hateten iha Australia maioria servisu sai enfermeira no mane maioria iha enjineru, maske sira (feto-mane) servisu hanesan maibe feto nafatin iha segundu pozisaun.
“Ezemplu feto nia salariu iha deit $5.000 kada fulan enkuantu mane fulan ida $7.000, ne’e diskiminasaun bo’ot ba feto sira iha Australia,”nia dehan.
Tuir nia, ida ne’e mak situasaun riil ne’ebe akontese iha Australia, maske Australia nasaun ne’ebe dezenvolvidu maibe kazu diskriminasaun ba feto kontinua akontese.
