Tuir Deputadu Mario Viegas Carascaláo, katak lei protesaun social ba feto faluk sira, oras ne’e dadaun Komisaun A diskute hela.
“Lei ne’e la’os deit fo protesaun ba feto faluk deit konserteza ba mos oan kiak sira (orfanatu sira) e sira tenke hetan duni protesaun social husi estadu,”hateten Deputadu Mario Viegas Carascaláo, semana kotuk iha PN.
Eis Vise Primeiru Ministru ne’e hatutan, alende fo protesaun ba feto faluk sira husi veteranus sira ne’ebe mate iha funu laran,mos fo protesaun social ba feto faluk hotu ne’ebe durante ne’e lahetan atensaun husi estadu.
“Ba ami partidu Sosial Demokrata (PSD) nia hakarak mak tenke fo protesaun ba ema sira hanesan ne’e e sira merese atu hetan protesaun,” nia katak.
Nia afirma, lei ne’e jeral, ba seguransa social: hanesan ema ne’ebe moras, empregu laiha, uma laiha, sasan sira ne’e hotu estadu tenke ajuda, hanesan hatama oan kiak ba eskola.
Maske lei ne’e foin mak tama iha komisaun A maibe depois de komisaun halo diskusaun sei hato’o ba meja hodi tau iha ajenda plenaria nian.
Iha parte seluk Xisto dos Santos, Prezidente Ezekutivu ( Board ) Aliansa Nasional Timor-leste ba Tribunal Internasional (ANTI) ejizi ba estadu atu bele konsidera no tau loron Masakre Kraras nian nudar loron Nasional ba eroi sira ne’ebe lakon sira nia vida ba luta determinasaun povu TL nian.
“ Akontesementu ne’e hela deit ba memoria ba oan kiak no faluk sira e ohin loron fatin ne’e konhesidu ho naran ‘ Fatin ba feto faluk sira’,” nia informa.
Xisto mos lamenta tanba maske tinan 10 ona TL ukun aan, maibe feto faluk no oan kiak sira seidauk hetan sira nia direitu no sira husu ba estadu atu lori autor sira hodi responsabiliza sira nia hahalok ne’e.
