Kona-ba jerador ne’eb sei monta iha Sentru Eletrifikasaun Betano, Sekretariu Estadu Eletrisidade Agua e Urbanizasaun, Januario Perreira sei haruka ekipa ida hodi ba hare jerador iha nasaun Europa.
“Konvite mai tiha ona e ami simu tiha ona, agora ami prepara hela se mak bele ba hare jerador ne’e,”hateten SE.Januario Perreira, semana kotuk iha Kaikoli,Dili.
Tuir nia, Sentru Eletrifikasaun Betano oras ne’e lina transmisaun la’o hela e hein para monta jerador iha fatin ne’eba.
Iha parte seluk Prezidente Komisaun G Parlamentar, Pedro da Costa Martires hateten jerador 8 ho marka warsila ba Betano nian rekomenda tiha ona.
“Prosesu ba jerador ne’e hotu tiha ona, tinan oin hanesan ne’e jerador sira prontu ona,”Pedro dehan.
Nia afirma, lina transmisaun ba parte tasi mane nian mak seidauk halo tanba sei iha prosesu identifikasaun fatin hodi harii tore sira ne’e.
“Agora sei iha faze negosiasaun ba fatin ho rai na’in atu hari tore sira ne’e, maske foin dadauk iha problema oituan kona-ba rai tanba falta esklaresimentu ba komunidade sira iha area ne’eba maibe agora servisu la’o hela,” Pedro informa.
Projetu Sentru Eletrifikasaun ne’e rasik kaer husi Kompania Tinolina e sira halo ona limpezas bazikas atu halo instalasaun ba sentral ne’e.
