Relasiona ho folin fos ne’ebe kontinua sa’e maka’as iha merkaduria,liu-liu iha capital Dili, tuir Xefe Suku Kaikoli, Hipolito Marques, katak ne’e la’os kulpa negosiante sira ne’ebe fa’an fos ne’e maibe ne’e kulpa governu nian.
“Governu la hanoin ita nia povu kiik sira nia susar durante tinan barak nia laran, to’o ita ukun aan tiha mos terus nafatin maibe govenru nunka tau matan,” hateten Xefe Suku Kaikoli, Hipolito Marques,semana kotuk iha Kaikoli,Dili.
Tuir Xefe Suku Marques,maske kompania barak mak hatama fos husi rai liur mai maibe folin fos kontinua aas tanba governu laiha mekanismu diak atu kontrola.
“Ita hare fos mai bar-barak no kompania sira mos hatama fos mai nafatin maibe folin sae nafatin tanba governu laiha mekanismu ne’ebe diak atu kontrola,” nia dehan.
Tuir nia, governu presiza kria tabela ba folin sasan sira nian, nune’e vendedor sira la arbiru hasa’e folin sasan inklui folin fos tuir sira nia hakarak. “Ne’ebe ne’e la’os kulpa negosiante sira nian,”.
“Hau husu ba Parlamentu atu kria netik lei oan ruma ho urjentimente, nune’e bele regula folin sasan ba nesesidade bazikas sira ne’e,”nia sujere.
Iha parte seluk, komunidade Kaikoli, Francisco Soares,lamenta ho folin fos ne’ebe sa’e maka’as iha merkaduria tanba hamate povu kbiit la’ek sira.
“Ami nudar povu ki’ik buat hotu kuran, fos folin sa’e ba be-beik entaun ami senti kbi’it la to’o atu sosa fos karun ida ho folin $15,00 to’o 18,00,” Soares halerik.
Tanba ne’e husu ba governu atu kria lei ida hodi regula folin fos ne’ebe kontinua sa’e maka’as iha merkaduria, nune’e kompania no negosiante sira labele hasa’e folin tuir sira nia hakarak.
Preokupasaun hanesan mai husi komunidade no mos hanesan dona da casa Enriqueta Pinto, katak folin fos ne’ebe sa’e be-beik bele hamate povu ki’ik sira ne’ebe laiha kbi’it atu sosa.
“Agora folin fos mos sae ba bebeik ami povu kik la iha rendimentu tan oinsa ami bele sosa fos folin ne’ebe mak karun liu,” Enriqueta katak.
