Atu asegura feto vitima husi violensia domestika ne’ebe oras ne’e hela iha Uma Mahon Lospalos, governu liu husi Ministeriu Solidaridade Sosial (MSS) presiza halo moru ba uma mahon ne’e.
Albina Freitas, Koordenador NGO Luzeiro ne’ebe tau matan ba Uma Mahon ne’e hateten oras ne’e dadaun iha vitima violensia domestika nain 4 mak hela iha uma mahon ne’e maibe nain 2 seluk transfere ona mai iha Fokupers.
“Lolos sira iha nain 4 maibe nain rua ami transfere tiha mai iha Dili iha Fokupers e nain 2 sei hela iha ne’eba maibe ami tauk sira sente laseguru tanba seidauk halo moru ba uma mahon ne’e,” hateten Albina Freitas,semana kotuk hafoin partisipa workshop Asembleia Jeral FONGTIL, iha Sentru Konvensaun Merkadu Munisipal Kaikoli,Dili.
Tuir nia, feto sira ne’e vitima husi violensia domestika ne’ebe halo husi sira nia la’en e sira sente trauma ho violensia fiziku ne’ebe sira hetan.
Nia hatutan, nia parte hato’o ona kestaun ne’e ba iha Ministeriu Solidaridade Sosial maibe to’o agora laiiha rezultadu.
“Maske seidauk akontese buat ruma ba vitima sira iha uma mahon ne’e, maibe ami tauk tanba ne’e ami husu ba MSS atu halo tiha moru ba uma mahon ne’e nune’e vitima sir abele hela ho seguru,” nia sujere.
Albina afirma, tinan kotuk MSS ba hare tiha uma mahon ne’e e sira promote ona katak sei halo moru. “Sira promote deit maibe laiha implementasaun, se bele halo moru lalais ona tanba se la’e autor sir abele ba provoka tan sira,”nia katak.
Entretantu tuir Kordenadora NGO Sentru Feto Haburas Dezenvolvementu (CFHD), Tereza Perreira katak uma mahon mak fatin ne’ebe seguru ba feto vitima husi violensia domestika, tanba ne’e governu iha responsabilidade atu hare kestaun ne’e.
“Se bele Ministeriu Solidaridade Sosial halo lalais moru ne’e, nune’e labele prejudika fali vitima no halo sira sai vitima liu tan,”nia husu.
