Tuir membru Parlamentu Nasional (PN) katak importante atu fo vasinasaun ba animal ne’ebe moras maibe presiza orsamentu ne’ebe bo’ot.
“Kuandu animal hanesan karau, fahi no manu moras ita tenke halo vasinasaun, tenke trata sira maibe ne’e presiza kustu ne’ebe bo’ot tanba ita presiza aimoruk ne’ebe bo’ot mos,”hateten Prezidente Komisaun D Parlamentar, Brigida Coreia, semana kotuk iha PN.
Tanba ne’e tuir nia, tinan-tinan Parlamentu sempre aprova orsamentu hodi aloka ba iha veterinariu.
“Tanba se bainhira ita la halo vasinasaun, kuandu pesti mai ne’e la eskapa, ne’ebe prevensaun ba animal ne’e importante,”nia dehan.
Iha fatin hanesan tuir Deputada Jacinta Perreira katak, vasinasaun animal ne’e kompetensia husi Ministeriu Agrikultura e Peska (MAP) liu-liu diresaun veternaria nian.
“Tanba ne’e husu ba ekipa veterinaria sira atu tama to’o iha sukus no aldeias hodi halo vasinasaun tanba ita nia komunidade barak mak hakiak animal,”nia esperansa.
Nia hatutan, antes atu ba halo vasinasaun, presiza halo uluk sosializasaun ba komunidade sira nune’e ekipa ne’e tun, komunidade sira prepara sira nia animal.
