Apoiu internet husi Timor Telekom (TT) ba Radio Komunidade Lospalos (RKL) iha 2009 funsiona deit durante fulan 2 e ate agora paradu, tuir Kordenador IT RKL, Francisco Hornai, konsidera apoiu ida ne’e hanesan sai projeitu deit.
“Sai projeitu deit e ami la satisfas tanba Timor Telekom hasai tiha ami nia foto publika iha Hotel Timor no iha sira nia website, ami hare Radio Komunidade Lospalos hanesan fali projeitu Timor Telekom nian,”hateten Francisco Hornai via telefone, semana kotuk iha Lospalos.
Tuir nia,internet ne’ebe aat parte TT ba hadia tiha maibe to’o agora seidauk diak e internet ne’e rasik sira monta iha 2009 no funsiona deit iha fulan rua nia laran.
Enkuantu Rocqui Braga Araujo,membru Parlamentu Foinsa’e husi distritu Ermera husu ba TT atu monta internet ba radio komunidade sira hotu nune’e bele fasilita informasaun ba komunidade sira liu-liu ba joventude sira.
“Kapas liu bainhira Timor Telekom fasilita Radio Komunidade sira ho Internet, nune’e ita nia komunidade, liu-liu estudante no joventude sir abele hetan asesu ba informasaun tantu informasaun iha rai laran no liur,”nia dehan.
Tuir Rocqui, oras ne’e dadaun estudante sira iha Universidade, liu-liu sira ne’ebe iha distritu araska hetan informasaun tanba sei iha limitasaun de livrus.
“Fasilita estudante sira liu-liu estudante universiadade iha distritu sira importante mak internet tanba dala ruma sira halo sira nia tugas haraska liu,”nia hateten.
Entretantu Hervino Barros da Costa,katak internet importante ba komunidade sira liu-liu estudante sira iha distritu tanba durante ne’e sira la hetan asesu ba informasaun.
“ita hare radio komunidade sira iha distritu la iha internet oinsa mak sir abele hetan informasaun husi rai laran no rai liur ho diak liu tan,”Hervino preokupa.
Tanba ne’e nia parte rekomenda ba governu atu servisu hamutuk ho TT oinsa mak bele estabelese internet ba Radio komunidade sira iha distritu nune’e sira iha distritu mos bele hetan informasaun.
