Hanesan mos Tribunal sira seluk, Tribunal Distrital Baucau (TDB) bainhira halo julgamentu sempre uza lian Tetun no Portugues tanba lian rua ne’emak nudar lian official iha Timor-leste (TL) ne’ebe garantia ona iha Konstituisaun RDTL.
“Ami iha tradutor na’in 3 mak tradus tuir ba komunidade sira bainhira sira balun la kompriende lian rua ne’e,”hateten Sekretariu Judisial TDB, Agostu Soares, semana kotuk iha Baucau.
Tuir nia, lian Tetun no Portugues garantia ona iha Konstituisaun Republika Demokratika Timor-leste (RDTL) iha artigu 104, entaun hakarak ka lakohi tenke uza lian rua ne’e.
Nia hatutan tuir kodigo penal dokumentus hotu-hotu inklui desizaun hotu hakerek hotu ho lian Tetun no Portugues.
“ Iha ne’e alende halo tradusaun ba lianTetun ami mos halo tradusaun ba lian seluk,” Soares esplika.
Entretantu komunidade Baucau, Jose Andre, sente kontente bainhira partisipa iha julgamentu ruma tanba tradutor sira tradus tu-tuir saida mak juis sira koalia.
“Se la’e ita lakompriende, tanba komunidade balun kompriende Tetun no balun la’e. Dalaruma hau rasik ladun kompriende desizaun husi juis sira entaun hau husu ajuda husi tradutor sira,”nia dehan.
