Atu prepara diak liu tan feto potensial sira iha Partidu Politiku ba eleisaun jeral tinan oin, Organizasaun Non Govermentais (NGO) Rede Feto (RF) sei fo formasaun ba sira iha Setembru fulan oin.
“Sim, ami sei fo formasaun ba feto husi partidu politiku sira hamutuk ema nain 100 iha fulan Setembru,” informa Membru Board Rede Feto, Paula Corte-real, semana kotuk hafoin partisipa iha workshop Asembleia Jeral FONGTIL, iha Sentru Konvensaun Dili, Kaikoli,Dili.
Tuir nia, oras ne’e dadaun nia parte halo ona preparasaun, liu-liu oinsa identifika feto potensial sira iha 22 partidu politiku sira bele partisipa iha formasaun ida ne’e.
“Ami sei halo enkontru ida ho prezidente partidus politikus 22 sira hodi hato’o ami nia termus de referensia no objetivu husi formasaun ida ne’e, nune’e bele prepara sira feto potensial sira partisipa iha formasaun ne’e,”nia dehan.
Paula afirma,objetivu jeral husi formasaun ne’e mak oinsa prepara feto potensial sira atu iha konesementu antes asumi kargu ida, “ezemplu iha parlamentu,sira tenke hatene informasaun antes kona-ba parlamentu nian e mos relasaun servisu politika entre orgaun soberaniu 4 ne’e oinsa,”Paula esplika.
Nia hatutan, treinamentu ida ne’e nakloke ba feto sira ne’ebe involve iha partidu politiku sira e kona-ba kada partidu sei haruka nia membru nain hira, Paula hatan “depende husi sira nia partidu rasik, mas ami targetkan ema na’in 100 tuir treinamentu ne’e, ba partidu sira ne’ebe bo’ot, ami bele simu sira nia feto nain 7 to’o 8, ba partidus ne’ebe sei ki’ik, feto nain 3 ka 4, depende,tanba ita hare agora iha partidu foun barak mak mosu,”nia esplika tan.
Enkuantu total orsamentu ba formasaun hamutuk $14 mil e orsamentu mai husi sosiedade sivil sira, Paula informa.
Entretantu tuir Diretora FONGTIL, Dinorah Granadeiro katak FONGTIL servisu hamutuk ho RF hodi realize formasaun ba feto parpol sira, liu-liu kona-ba preparasaun eleisaun jeral ne’ebe sei hala’o iha 2012 oinsa mak numeru feto bele aumenta.
“Materia hirak ne’ebe sei fo iha treinamentu ne’e mak kona-ba lideransa nian, oinsa koalia iha publiku (public speaking),oinsa bele maneja aan ho didiak karik sira kandidata aan no karik sira eleitu, sira tenke hatene sira nia knar,”informa Granadeiro.
