“Tenke iha konesementu luan, fokal no iha komitmentu maka’as atu luta ba feto nia interese, iha komitment ba partidu, servisu nain e liu-liu buka transforma buat ruma intermus de feto nia vida iha setor hotu,” hateten Paula Corte-real, semana kotuk iha Sentru Konvensaun Dili, Kaikoli,Dili.
Tanba ne’e, Paula esperansa katak feto sira ne’ebe sei tuir iha treinamentu ne’e, mesak feto sira ne’ebe potensial tebes no sira nia naran tama ona iha lista kandidatura “ne’e mak ami nia target.”
Tuir nia, treinamentu ida ne’e sei la para deit iha ne’e, maibe depois de feto sira ne’e sai lideransa, treinamentu kontinua la’o,liu-liu oinsa mak sira maneja orsamentu, hatene didiak sira knar no seluk tan.
Entretantu tuir Diretora Forum NGO Timor-leste (FONGTIL) Dinorah Granadeiro, katak feto kualidade mak feto ne’ebe iha konesementu diak kona-ba prosesu dezenvolvementu hotu, liu-liu kona-ba asuntu feto nian.
“Katak bainhira sira tutela kargu ruma iha nivel altu, sira bele dezena sira nia planu rasik,” hateten Granadeiro.
Tanba ne’e nia parte husu ba feto maluk sira ne’ebe involve aan iha partidus politikus, liu-liu ba sira ne’ebe sei kandidata aan iha eleisaun jeral tinan oin atu prepara aan didiak hodi compete ho mane sira.
“Lei fo biban ba ita, maibe ita tenke hatudu ita nia kapasidade katak ita mos bele hodi compete ho mane sira, liu-liu oinsa mak bele foti desizaun ruma ba interese feto nian,” nia afirma.
